Янги йил байрами муносабати билан «Янги Ўзбекистон» боғига ташриф буюрувчиларга қулайлик яратиш мақсадида «Дўстлик» метро бекатидан боғга қадар бепул қатновчи автобуслар йўлга қўйилди. Бу ҳақда «Тошшаҳартрансхизмат» матбуот хизмати хабар берди.
Ўзбекистоннинг энг баланд саналган бош Янги йил арчаси «Янги Ўзбекистон» боғида ўрнатилиши тўғрисида хабар берилганди. Шу муносабат билан «Янги Ўзбекистон» боғига ташриф буюрувчи фуқаролар ва пойтахт меҳмонларига сифатли ҳамда қулай транспорт хизматини кўрсатиш мақсадида 20 декабрдан 2022 йилнинг 10 январь кунига қадар «Дўстлик» метроси—«Янги Ўзбекистон боғи» йўналишида ҳаракатланувчи махсус бепул автобуслар ишга туширилган.
Ушбу автобус йўналиши соат 08:00 дан 22:00 га қадар ҳаракатланади. Автобуснинг ҳаракат жадваллари сони — 6 та, ҳаракатланиш вақти эса 10-11 дақиқа оралиғини ташкил этади.
Эслатиб ўтамиз, «Янги Ўзбекистон» боғи 31 август куни очилган. Ўзбекистон мустақиллигининг 30 йиллигига бағишланган байрам мушакбозлиги ҳам шу боғда ўтказилганди. Бироқ боғга олиб борувчи йўлда транспорт ҳаракати 3 кунга — 31 августдан 2 сентябргача чеклангани сабабли уни яқиндан кўришнинг имкони бўлмаганди.
Изоҳ (0)