Ijtimoiy tarmoqlarda Xalq deputatlari Jizzax viloyati kengashining 20-dekabr kuniga belgilangan sessiyasida viloyat hokimi Ergash Soliyevning murojaatnoma yo‘llashi (ayni vaqtda bo‘lib o‘tmoqda) va unda deputatlardan hokimiga savol bermaslik talab qilinayotgani haqida xabarlar tarqaldi, deb yozadi “Gazeta.uz”.
Ta’kidlanishicha, shahar va tuman kengashlarining deputatlari, doimiy komissiyalar raislari va kotibiyatlar rahbalari rasmiy formada (oq ko‘ylak, qora shim, galstuk, deputatlik nishoni, guvohnomada) tashrif buyurishi kerak.
Shuningdek, viloyatdagi kengashlar kotibiyatlari mudirlariga yo‘llangan xatda sessiyaga telefon bilan qo‘yilmasligi haqida ogohlantirilgani aytilmoqda. Bundan tashqari, majlis ishtirokchilari zalda soat 09:00 da bo‘lishi, ro‘yxatdan o‘tishi va belgilangan joyini 09:30 da egallashi kerak. Sessiyada savollar berilmaydi.
“Agar sessiya kun tartibi bo‘yicha intervyu beradiganlar bo‘lsa, viloyat hokimi murojaatidan kelib chiqish lozim hamda sessiya bo‘lib o‘tayotgan jarayonda savollar berilmaydi”, — deyilgan xatda.
Qonunchilik palatasi deputati Rasul Kusherbayevning yozishicha, unga jizzaxlik deputatlar “sessiyasda mazkur cheklovlarga talablar viloyat kengashi kotibiyati mudirining tashabbusi bilan qilinganini” aytgan.
“Ya’ni kotibiyat mudiri bo‘lgan deputatning o‘zi deputatlarga cheklov o‘rnatmoqchi”, — deya fikr bildirgan deputat.
“Jizzax huquqiy maqomiga ko‘ra qanday hudud? Bilishimizcha, u hamon O‘zbekiston takibidagi bitta viloyat. Deputatda mol-mulkiga nisbatan ham daxlsizlik huquqi mavjudligi sababli, sessiyaga shaxsiy telefonlari bilan kiritmaslik bo‘yicha cheklov o‘rnatilishi ham g‘ayriqonuniy”, — deb yozadi Kusherbayev.
U Jizzax ham Konstitutsiyasi bor O‘zbekistonning bir qismidagi hudud sifatida O‘zbekiston qonunlariga amal qilishi va hokimi deputatlarning savollariga javob berishiga umid bildirgan.
Kotibiyatning munosabati
Jizzax viloyati hokimiyati matbuot xizmati viloyat Kengashi kotibiyatining munosabatini e’lon qildi.
Ta’kidlanishicha, Xalq deputatlari mahalliy Kengashlarining reglamentiga asosan, deputatlar deputatlik odobi va talablaridan kelib chiqqan holda o‘tkaziladigan sessiyalarga rasmiy kiyimda kelishi kerak bo‘ladi.
Ssessiya yig‘ilishi viloyat televideniyasi hamda ijtimoiy tarmoqlarda to‘g‘ridan to‘g‘ri yoritilishini inobatga olgan holda sessiya yig‘ilishiga xalaqit bermaslik maqsadida telefon ovossiz holatga keltirish tavsiya etilgan. Ayrim tumanlarning uzoqligi sababli reglamentga asosan, deputatlarning sessiya yig‘ilishiga kechikib kelishiga yo‘l qo‘ymaslik uchun eslatilgan”, — deyiladi munosbatda.
Xalq deputatlari mahalliy Kengashlari reglamentining 61-moddasiga asosan, viloyat hokimi har yili viloyat Kengashiga hudud ijtimoiy-iqtisodiy rivojlanishning eng muhim va dolzarb masalalari yuzasidan hisobot taqdim etishi belgilangan.
“Ushbu sessiya kun tartibiga kiritilgan (viloyat hokimining) murojaatnomasi barcha deputatlar ishtirokida doimiy komissiyalar yig‘ilishida batafsil muhokama etilgan hamda sessiyadan keyin ochiq tarzda matbuot anjumani o‘tkazilishi rejalashtirilgan va deputatlar matbuot anjumaniga taklif etilgan”, — deya qayd etiladi xabarda.
“Deputat — maktab o‘quvchisi emas”
Rasul Kushebayevning yozishicha, ijtimoiy tarmoqlardagi tanqidlardan so‘ng, deputatlarga telefon olib kirishga ruxsat berilgan, biroq “ovozsiz rejimni” yoqib qo‘yish talab etilgan. Shu bilan birga u “rasmiy kiyim” borasidagi talabga tushunmaganini ta’kidlagan.
“Chunki o‘zim ham ‘rasmiy kiyim’ nima ekanini bilmayman. Qonunchilikda buning tushunchasi yo‘q afsuski: yevropacha kostyummi, qora ko‘ylakmi yoki milliy choponmi haliyam noma’lum”, — deydi u.
“Faqat bir narsani esdan chiqarmaslik kerak: deputat maktab bolasi emas, u minglab odamlar tomonidan saylangan, mustaqil shaxs. Oq ko‘ylakda kel, telefonni o‘chirib kel, savolsiz kel, kabi gaplar maktab bolasiga aytiladi. O‘zi ‘Kengash raisi masalasi’ hal bo‘lmaguncha mahalliy deputatlar ishida o‘nglanish bo‘lmasligi ko‘rinib turibdi”, — deb yozadi Rasul Kusherbayev.
Eslatib o‘tamiz, 2020-yilning 15-sentabrida prezident “Xalq deputatlari Kengashlari faoliyati takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartishlar kiritish to‘g‘risida”gi qonunni imzolagandi. Ular xalq deputatlari Kengashlari faoliyatiga tashkiliy-texnik va boshqa xizmatlar ko‘rsatish bilan shug‘ullanadi. Oldinlari bu bilan hokimliklar apparati shug‘ullangan bo‘lib, bu hokimiyatlarning bo‘linishi tamoyiliga zid edi. Senat raisi Tanzila Norboyeva deputatlar uzoq yillar davomida alohida kotibiyatning tashkil etilishi to‘g‘risida orzu qilganlarini ta‘kidlab o‘tgandi.
Izoh (0)