O‘zbekistonda koronavirusning “omikron” shtammi sabab Yangi yilni oila davrasida kutib olish tavsiya etildi
Respublika maxsus komissiyasining yig‘ilishida O‘zbekistonda epidemiologik vaziyat barqarorligini saqlab qolish va mamlakat hududiga koronavirus infeksiyasining yangi “omikron” shtammi kirib kelishiga yo‘l qo‘ymaslik maqsadida bir qator yangi tartiblar belgilandi, deb xabar beradi SSV matbuot xizmati.
Unga ko‘ra, aholi salomatligini ta’minlash hamda O‘zbekistonda epidemiologik vaziyat barqarorligini saqlash maqsadida fuqarolarga yangi 2022-yil bayrami tadbirlarini imkon qadar oila davrasida o‘tkazish tavsiya etilgan.
Bundan avval Respublika maxsus komissiyasi qarori bilan O‘zbekiston epidemiologik vaziyat murakkab bo‘lgan bir qator davlatlar bilan xalqaro aviaqatnovlarni to‘xtatishi haqida xabar berilgan edi. Shuningdek, endilikda O‘zbekistonga ayrim davlatlardan keluvchilar majburiy karantinga olinadi.
Eslatib o‘tamiz, Sanitariya-epidemiologik osoyishtalik va jamoat salomatligi xizmati boshlig‘i o‘rinbosari, tibbiyot fanlari doktori, professor Nurmat Otabekov koronavirusning Afrikada aniqlangan yangi shtammi — “omikron” ikkinchi va uchinchi mamlakatlar orqali O‘zbekiston hududiga kirib kelishi ehtimoli mavjudligini aytgandi. Jahon sog‘liqni saqlash tashkiloti ushbu shtammni butun dunyo uchun xavfli deya tan olgan.
