Qashqadaryo viloyati hokimi Murodjon Azimov 2021-yilgi ijtimoiy-iqtisodiy rivojlanish yakunlari hamda 2022-yil uchun belgilangan vazifalar yuzasidan aholiga murojaatnomasida Qarshi shahridagi “Shodlik” mahallasida joylashgan 2-sonli yotoqxona haqida gapirib, holat uni tashvishga solganini bildirdi. Bu haqda sessiyada qatnashayotgan “Daryo” muxbiri xabar berdi.
“Qarshi shahridagi ‘Shodlik’ mahallasida joylashgan yotoqxona masalasiga ham to‘xtalib o‘tishim joiz. Ijtimoiy tarmoqlarda yoritilgan mazkur muammoni joyiga borib, o‘zim o‘rgandim. Aholi bilan muloqotda bo‘ldim. Meni qattiq tashvishga solgani, yotoqxonada hech qanday sharoiti bo‘lmagan xonalarda yashayotgan farzandlar ta’lim-tarbiyasi va taqdiri qanday kechadi? Tezlik bilan bu yerda homiylik asosida ta’mirlash ishlari boshlab yuborildi. Viloyat rahbari sifatida aytishim kerak, yotoqxonada turadigan har bir insonning taqdiri alohida e’tiborga olingan”, — deydi viloyat rahbari.
Qayd etilishicha, Murodjon Azimov uy-joyga ehtiyoji bor bo‘lgan fuqarolarga uy-joy berilishini, davolanishi zarur bo‘lganlarga tibbiy xizmat ko‘rsatilishini, yolg‘iz, boquvchisini yo‘qotgan odamlarning taqdiri e’tiborida ekanini aytgan.
Avvalroq Qarshi shahrining “Shodlik” mahallasida joylashgan 2-sonli yotoqxona xarob ahvolda ekani, viloyat va shahar hokimligi holatga e’tibor qaratmayotgani haqida xabar berilgandi. Shundan so‘ng viloyat hokimligi mazkur shikoyatga e’tibor qaratib, yotoqxona tadbirkorga tegishli mulk ekanini yozdi va tadbirkorlik subyektida davlat mablag‘lari hisobidan ta’mirlash ishlarini olib borish qonunga zid ekanini ta’kidladi. 13—14-dekabr kunlari mazkur yotoqxonada homiylar hisobidan ta’mirlash ishlari boshlab yuborilgan.
Izoh (0)