Niderlandiya hukumati koronavirusning yangi “omikron” shtammi tarqalishi tufayli Yevropa Ittifoqi mamlakatlari orasida birinchi bo‘lib lokdaun joriy qildi. Bu haqda Meduza xabar berdi.
Mamlakatda umumiy o‘zini-o‘zi yakkalash tartibi 19-dekabrdan 14-yanvargacha amal qiladi.
Bu davrda nooziq-ovqat do‘konlari, barlar, restoranlar, sartaroshxonalar, muzeylar, kinoteatrlar va sport zallari ishlamaydi. Maktablar kamida 9-yanvargacha yopiq bo‘ladi.
Mahalliy aholiga ikki kishidan ortiq odamni uyiga taklif qilish taqiqlanadi (Rojdestvoda to‘rttagacha mehmon taklif qilinishi mumkin). Jamoat joylarida ko‘pi bilan ikki kishi to‘planishi mumkin.
Niderlandiyada “omikron” bilan kasallanishning ilk holatlari uch hafta oldin aniqlangan.
Tibbiy prognozlarga ko‘ra, Yangi yil va Rojdestvo bayramlarigacha “omikron” mamlakatda koronavirusning asosiy turiga aylanadi. Niderlandiyada jami 2,9 million kishida COVID-19 qayd etilgan, 20 mingdan ortiq odam infeksiyadan vafot etgan.
Avvalroq Germaniya “omikron” shtammi tufayli britaniyaliklarning mamlakatga kirishini cheklagan edi. Aviakompaniyalarga 20-dekabr, yarim tundan boshlab Britaniyadan Germaniyaga sayyohlarni tashish taqiqlanadi.
Jahon sog‘liqni saqlash tashkiloti bosh direktori Tedros Gebreyesusning ma’lum qilishicha, “omikron” varianti oldingi shtammlardan ko‘ra tez tarqalmoqda va hozirda u dunyoning 77 mamlakatida qayd etilgan.
Koronavirusning “omikron” shtammi birinchi marta 11-noyabr kuni Janubiy Afrikada topilgan. Britaniyalik olimlarning ta’kidlashicha, yangi shtamm tarqalish tezligi tufayli avvalgilariga, jumladan, deltaga qaraganda xavfliroq bo‘lishi mumkin. Jahon sog‘liqni saqlash tashkiloti mavjud vaksinalar ushbu shtammga qarshi samarasiz bo‘lishi mumkin, degan shubhalar tufayli “omikron”ni xavfli deb tan oldi. Tashkilot, shuningdek, ilgari koronavirusni boshdan o‘tkazganlarda “omikron” bilan qayta kasallanish ehtimoli yuqoriligini ma’lum qildi.
Izoh (0)