Filippinga yopirilgan Rai tayfuni 75 kishining hayotiga zomin bo‘ldi. 10 kishi bedarak yo‘qolgan, deb hisoblanmoqda. Bu haqda AFP’ga tayanib, “Kommersant” xabar berdi.
Avvalroq tayfun oqibatida 20 ga yaqin odam halok bo‘lgani xabar qilingan.
Filippinda tabiiy ofat sabab uzilgan aloqa hali tiklanmagan, shuning uchun tayfun qurbonlari haqidagi ma’lumotlar yakuniy emas. Boxol provinsiyasi gubernatori Artur Yap qurbonlar soni ortishi mumkinligidan xavotirda.
Rai tayfuni Filippin qirg‘oqlariga 16-dekabr payshanba kuni yetib kelgandi. O‘n minglab aholi maktab va hukumat binolarida joylashgan xavfsiz hududlarga evakuatsiya qilingan. Ayrim odamlarni majburan evakuatsiya qilishga to‘g‘ri kelgan.
Ba’zi joylarda shamol tezligi soatiga 185 kilometrga yetgan, maksimal tezlik soatiga 195 kilometrni tashkil etgan. Mahalliy hokimiyat organlari yomon ob-havo tufayli yo‘llar va ko‘priklarga yetkazilgan zararni taxminan 178,4 million Filippin pesosiga (3,56 million dollar) baholadi.
Eslatib o‘tamiz, Filippinda aprel oyida Surigay tayfuni sodir bo‘lib, 60 ming kishi evakuatsiya qilingandi. O‘shanda shamol tezligi 195 kilometr soatga yetib, uylarning tomini vayron qilgan va daraxtlarni qo‘porib tashlagan.
Izoh (0)