Dekabr oyining birinchi yarmida Ashxobodda politsiya kuzovida qora detallarga ega bo‘lgan avtomobillarga qarshi navbatdagi reydlarni o‘tkazdi, deb xabar beradi “Xronika Turkmenistana”.
2018-yilning yanvaridan boshlab Turkmanistonda oqdan boshqa barcha rangdagi avtomobillarga yashirin taqiq joriy etilgan. 2020-yilning kuzida politsiyachilar kuzovidagi ayrim detallari, masalan, eshik tutqichlari, orqani ko‘rishga mo‘ljallangan oynalari va bamperlari qora bo‘lgan mashinalarni to‘xtatishni boshlagan.
2021-yilda esa poytaxtning ko‘plab ko‘chalarida besh-olti nafar politsiyachi turib olib, barcha avtomobillarni to‘xtatgan. Haydovchining hujjatlarida yoki mashina rangiga oid muammolar aniqlansa, avtomobil zudlik bilan jarima maydonchasiga yuborilgan. Ikki kun ichida Choganlidagi politsiya boshqarmasi binosi oldidagi maydoncha mashinaga to‘lib ketgan va qoidabuzar avtomobillar poytaxtning Yubileyniy ko‘chasidagi boshqa yirik avtoturargohga jo‘natila boshlangan.
Natijada u yerda 200 ga yaqin avtomobil to‘plangan. Erta tongdan va avtoturargoh yopilguniga qadar u yerga ko‘plab odamlar kelgan. Haydovchilar jarimani to‘lash uchun uzoq navbatda turgan, politsiyachilar bilan kelishishga uringan. Avtoturargohning kirish qismiga jarimalarni to‘lash uchun mo‘ljallangan kassaga ega konterner o‘rnatilgan.
Ta’kidlanishicha, ayrim avtomobil egalari avtoturargohning o‘zida mashinaning qora detallarini bo‘yagan. Ularning so‘zlariga ko‘ra, bu safar politsiyachilar faqatgina yirik detallar — qora bamper, radiator panjaralari yoki orqani ko‘rishga mo‘ljallangan ko‘zgu bilan cheklanmagan, balki korpusdagi kichik qora detallarga ham e’tiroz bildirgan. Masalan, haydovchilar ko‘zgular qotirilgan qora plastiklarni oq rangga bo‘yashga majburlangan.
Toyota Hilux pikaplarining egalarida esa original yorliqlari sabab muammo yuzaga kelgan — ushbu modellardagi kabi bezaklar mamlakatda endilikda taqiqlangan. Haydovchilar maydonchaning o‘zida ularni fen bilan qizdirib, yulib tashlamoqda.
Shuningdek, oldinroq bo‘yalgan rang kuyib, korpusning asosiy rangidan farqlanib qolgan bo‘lsa ham, mashinani bo‘yash talab etilmoqda.
Ayni vaqtda reydlar tugagan, ammo ayrim haydovchilar har ehtimolga qarshi mashinalarining barcha detallarini oq rangga bo‘yab chiqqan. Ayrim haydovchilarning qayd etishicha, bu yordam bermaydi va politsiyachilar “baribir kamchilik topadi”. Ular bu kabi reydlarning maqsadi bayram oldidan jarima to‘plash ekaniga ishonmoqda.
Eslatib o‘tamiz, 2014-yilda turkmanistonlik mansabdorlar qora Mercedes’larini oq rangdagilariga almashtirishga majbur qilingandi. 2015-yilda Turkmanistonda qora rangdagi avtomobillarni mamlakatga olib kirish taqiqlab qo‘yilgani haqida xabarlar tarqalgan.
Izoh (0)