Нидерландия ҳукумати коронавируснинг янги «омикрон» штамми тарқалиши туфайли Европа Иттифоқи мамлакатлари орасида биринчи бўлиб локдаун жорий қилди. Бу ҳақда Meduza хабар берди.
Мамлакатда умумий ўзини-ўзи яккалаш тартиби 19 декабрдан 14 январгача амал қилади.
Бу даврда ноозиқ-овқат дўконлари, барлар, ресторанлар, сартарошхоналар, музейлар, кинотеатрлар ва спорт заллари ишламайди. Мактаблар камида 9 январгача ёпиқ бўлади.
Маҳаллий аҳолига икки кишидан ортиқ одамни уйига таклиф қилиш тақиқланади (Рождествода тўрттагача меҳмон таклиф қилиниши мумкин). Жамоат жойларида кўпи билан икки киши тўпланиши мумкин.
Нидерландияда «омикрон» билан касалланишнинг илк ҳолатлари уч ҳафта олдин аниқланган.
Тиббий прогнозларга кўра, Янги йил ва Рождество байрамларигача «омикрон» мамлакатда коронавируснинг асосий турига айланади. Нидерландияда жами 2,9 миллион кишида COVID-19 қайд этилган, 20 мингдан ортиқ одам инфекциядан вафот этган.
Аввалроқ Германия «омикрон» штамми туфайли британияликларнинг мамлакатга киришини чеклаган эди. Авиакомпанияларга 20 декабрь, ярим тундан бошлаб Британиядан Германияга сайёҳларни ташиш тақиқланади.
Жаҳон соғлиқни сақлаш ташкилоти бош директори Тедрос Гебрейесуснинг маълум қилишича, «омикрон» варианти олдинги штаммлардан кўра тез тарқалмоқда ва ҳозирда у дунёнинг 77 мамлакатида қайд этилган.
Коронавируснинг «омикрон» штамми биринчи марта 11 ноябрь куни Жанубий Африкада топилган. Британиялик олимларнинг таъкидлашича, янги штамм тарқалиш тезлиги туфайли аввалгиларига, жумладан, дельтага қараганда хавфлироқ бўлиши мумкин. Жаҳон соғлиқни сақлаш ташкилоти мавжуд вакциналар ушбу штаммга қарши самарасиз бўлиши мумкин, деган шубҳалар туфайли «омикрон»ни хавфли деб тан олди. Ташкилот, шунингдек, илгари коронавирусни бошдан ўтказганларда «омикрон» билан қайта касалланиш эҳтимоли юқорилигини маълум қилди.
Изоҳ (0)