Germaniya Buyuk Britaniyani koronavirus mutatsiyalari tarqalayotgan zona deb tan oldi va ushbu mamlakatdan tashrif buyuruvchilarning Germaniyaga kirishini vaqtincha chekladi. Bu haqda 18-dekabr kuni Germaniya Federativ Respublikasi Sog‘liqni saqlash vazirligi qoshidagi Robert Kox instituti saytida ma’lum qilingan.
Institut Shimoliy Irlandiya, Men orollari va Normand orollari bilan birga Buyuk Britaniyani koronavirus variantlari tarqalayotgan hududlar ro‘yxatiga kiritdi. Cheklovlar joriy etish orqali GFR hukumati o‘z hududlarida “omikron” shtammi tarqalishining oldini olishga umid qilmoqda.
Shunday qilib, aviakompaniyalarga 20-dekabr, yarim tundan boshlab Britaniyadan Germaniyaga sayyohlarni tashish taqiqlanadi. Buyuk Britaniyadan mamlakatga kirish uchun faqat Germaniya fuqarolari va rezidentlari, ularning turmush o‘rtoqlari va farzandlari hamda tranzit yo‘lovchilarga ruxsat beriladi.
Buyuk Britaniyadan Germaniyaga kelgan har bir kishidan PZR-testining manfiy natijasi talab etiladi, shuningdek, tashrif buyuruvchilar emlanganlik holatidan qat’i nazar, 14 kun davomida karantinda bo‘lishi shart.
Germaniya Sog‘liqni saqlash vazirligi xabarida qayd etilishicha, cheklovlar kamida 3-yanvargacha davom etishi mumkin. Bunday qaror Buyuk Britaniyada “omikron” shtammining tez tarqalishi bilan bog‘liq xavotirlar fonida qabul qilingan.
Germaniya instituti tomonidan Buyuk Britaniyadan tashqari, Botsvana, Esvaniti, Lesoto, Malavi, Mozambik, Namibiya, Zimbabve, Janubiy Afrika ham COVID-19 mutatsiyalarining tarqalish zonalari ro‘yxatiga kiritilgan.
Jahon sog‘liqni saqlash tashkiloti bosh direktori Tedros Gebreyesusning ma’lum qilishicha, “omikron” varianti oldingi shtammlardan ko‘ra tez tarqalmoqda va hozirda u dunyoning 77 mamlakatida qayd etilgan.
Britaniya bosh vaziri Boris Jonson mamlakatda “omikron” shtammi bilan kasallangan bemor vafot etganini aytgandi. Bungacha dunyoda “omikron” shtammidan birorta o‘lim holati ma’lum emasdi. Boris Jonson “omikron” shtammi sabab voyaga yetgan barchaga Yangi yilga qadar revaksinatsiyadan o‘tishga ruxsat bergan. Shuningdek, Jonson Angliyada “B rejani” joriy etgandi — Buyuk Britaniyada hozirda 3 mingdan ortiq odamda “omikron” shtammi tasdiqlangan.
Izoh (0)