Eron hukumati inson huquqlarining jiddiy buzilishi holatlarida ishtirok etayotgan AQSh kompaniyalari va fuqarolariga qarshi sanksiyalar joriy qilishni rejalashtirmoqda. “TASS”ning IRNA agentligiga tayanib xabar berishicha, respublika sud hokimiyati rahbarining xalqaro ishlar va inson huquqlari bo‘yicha o‘rinbosari Kozim G‘arib Abadiy shunday tashabbus bilan chiqqan.
Rasmiyning so‘zlariga ko‘ra, “AQShning Eronga qarshi sanksiyalari va Eronga maksimal bosim o‘tkazish siyosati muvaffaqiyatsizlikka uchraydi”. “AQSh o‘z siyosiy maqsadlariga erishish uchun sanksiyalardan foydalanmoqda. Tez orada inson huquqlarini jiddiy poymol qilishda ishtirok etayotgan AQSh tashkilotlari va shaxslari ro‘yxatini e’lon qilamiz. Eron bu shaxslar va tuzilmalarga qarshi sanksiyalar joriy qiladi”, — dedi G‘arib Abadiy.
Uning so‘zlariga ko‘ra, “Amerika qamoqxonalarida mahbuslarga nisbatan qiynoqlar va noqonuniy muomalaga oid ko‘plab misollar bor”, bularning barchasi uchun “AQSh javobgarlikka tortilishi kerak”.
Vashingtonning Tehronga qarshi sanksiyalari haqida gap ketar ekan, G‘arib Abadiy bunday bosim “Eron xalqi uchun xavf tug‘dirganini, Eron klinikalarida bemorlarni dori-darmon va tibbiy asbob-uskunalarsiz qoldirganini” aytdi.
7-dekabr kuni AQSh Moliya vazirligi Eronga qarshi yangi sanksiyalar kiritgan edi. Bu safar yetti nafar eronlik shaxs va mamlakatning ikki huquq-tartibot idorasi cheklovlar ostiga tushgan. AQSh Davlat departamentida ta’kidlanishicha, “Amerika dushmanlariga sanksiyalar orqali qarshi turish to‘g‘risida”gi qonunga muvofiq cheklovlar Vashington nazdida Eronda xalqaro miqyosda tan olingan inson huquqlarining buzilishi uchun javobgar ikki shaxsga, shuningdek, Zohidon va Isfaxon shaharlaridagi ikkita qamoqxonaga qarshi kiritilgan. Davlat departamentiga ko‘ra, ushbu axloq tuzatish muassasalari suddan tashqari qatl va o‘zboshimchalik bilan hibsga olishlar uchun javobgardir.
Izoh (0)