Xitoyda neytrallashtiruvchi antitanalar asosida ishlab chiqarilgan va COVID-19 ga qarshi qo‘llanadigan ilk kombinatsiyali terapiya tasdiqlandi. Bu haqda XXR farmatsevtika mahsulotlarini nazorat qilish davlat boshqarmasi matbuot xizmatiga tayanib, “Korrespondent.net” xabar berdi.
Dori vositasi kattalar va 12 yoshdan 17 yoshgacha bo‘lgan o‘smirlarda koronavirusni davolashda qo‘llanadi. Inyeksiyaga mo‘ljallangan eritma shaklidagi preparatni ro‘yxatdan o‘tkazish to‘g‘risidagi arizani Pekinning Tengsheng Huachuang Pharmaceutical Technology kompaniyasi topshirgan.
Preparatning komponentlari BRII-196 va BRII-198 deb nom oldi. Ta’kidlanishicha, bu XXRda mustaqil intellektual mulk huquqlari bilan tasdiqlangan ilk kombinatsiyali terapiya.
Avvalroq Buyuk Britaniya dunyoda birinchi bo‘lib COVID-19 ga qarshi Amerikaning Merck va Ridgeback Biotherapeutics kompaniyalari tomonidan ishlab chiqilgan antivirus tabletkalarini ma’qullagani xabar qilingandi.
Buyuk Britaniyada preparatga Lagevrio nomi berilgan. O‘tgan oylarda o‘tkazilgan tadqiqotlar shuni ko‘rsatdiki, preparat koronavirusning og‘ir shaklini boshdan o‘tkazish ehtimoli yuqori bo‘lganlar uchun o‘lim yoki kasalxonaga yotqizish xavfini ikki baravar kamaytirishi mumkin.
Izoh (0)