Shveysariya parlamenti tashqi ishlar vaziri Inyatsio Kassisni mamlakatning yangi prezidenti etib sayladi. Bu haqda Shveysariya TIV saytida xabar berilgan.
2022-yilning 1-yanvaridan Kassis amaldagi prezident Gi Parmelendning o‘rnini egallaydi.
Shveysariya prezidenti davlat rahbari hisoblanmaydi, mamlakatni kollektiv ravishda butun Federal Kengash boshqaradi. Biroq uning ovozi Federal Kengashda dolzarb masalalarni muhokama qilishda hal qiluvchi ahamiyatga ega. “Tenglar orasida birinchi” sifatida prezident kengashning qolgan a’zolariga ko‘rsatma berish huquqiga ega emas, u o‘z departamentini boshqarishda davom etadi. Shveysariya prezidenti parlament tomonidan Federal Kengash a’zolari orasidan bir yil muddatga saylanadi va asosan vakillik funksiyalari bilan shug‘ullanadi.
An’anaga ko‘ra, lavozim boshqaruv kengashi a’zolari o‘rtasida “aylantiriladi”, o‘tgan yilgi vitse-prezident bu yil prezidentlikka saylanadi. Shu bilan birga, prezident ikkinchi muddatga qayta saylanishi mumkin emas: muddati tugagach, u prezidentlikka tayinlanishidan oldin o‘zi boshqargan vazirlikka qaytadi.
Inyatsio Kassis ma’lumoti bo‘yicha shifokor bo‘lib, Syurix universitetida tibbiyot fakultetida tahsil olgan, uni 1987-yilda tugatgan. U Shveysariya Milliy Kengashi tarkibiga kirgan va Shveysariya Tibbiyot assotsiatsiyasi vitse-prezidenti bo‘lgan. Kassis 2017-yildan mamlakat Tashqi ishlar vazirligini boshqargan.
Avvalroq Germaniya Sotsial-demokratik partiyasi rahbari Olaf Shols rasman Germaniyaning yangi kansleri etib saylangandi. U ushbu lavozimda Germaniya hukumatini 16 yil boshqargan Angela Merkelning o‘rnini egalladi.
Izoh (0)