Эрон ҳукумати инсон ҳуқуқларининг жиддий бузилиши ҳолатларида иштирок этаётган АҚШ компаниялари ва фуқароларига қарши санкциялар жорий қилишни режалаштирмоқда. «ТАСС»нинг IRNA агентлигига таяниб хабар беришича, республика суд ҳокимияти раҳбарининг халқаро ишлар ва инсон ҳуқуқлари бўйича ўринбосари Козим Ғариб Абадий шундай ташаббус билан чиққан.
Расмийнинг сўзларига кўра, «АҚШнинг Эронга қарши санкциялари ва Эронга максимал босим ўтказиш сиёсати муваффақиятсизликка учрайди». «АҚШ ўз сиёсий мақсадларига эришиш учун санкциялардан фойдаланмоқда. Тез орада инсон ҳуқуқларини жиддий поймол қилишда иштирок этаётган АҚШ ташкилотлари ва шахслари рўйхатини эълон қиламиз. Эрон бу шахслар ва тузилмаларга қарши санкциялар жорий қилади», — деди Ғариб Абадий.
Унинг сўзларига кўра, «Америка қамоқхоналарида маҳбусларга нисбатан қийноқлар ва ноқонуний муомалага оид кўплаб мисоллар бор», буларнинг барчаси учун «АҚШ жавобгарликка тортилиши керак».
Вашингтоннинг Теҳронга қарши санкциялари ҳақида гап кетар экан, Ғариб Абадий бундай босим «Эрон халқи учун хавф туғдирганини, Эрон клиникаларида беморларни дори-дармон ва тиббий асбоб-ускуналарсиз қолдирганини» айтди.
7 декабрь куни АҚШ Молия вазирлиги Эронга қарши янги санкциялар киритган эди. Бу сафар етти нафар эронлик шахс ва мамлакатнинг икки ҳуқуқ-тартибот идораси чекловлар остига тушган. АҚШ Давлат департаментида таъкидланишича, «Америка душманларига санкциялар орқали қарши туриш тўғрисида»ги қонунга мувофиқ чекловлар Вашингтон наздида Эронда халқаро миқёсда тан олинган инсон ҳуқуқларининг бузилиши учун жавобгар икки шахсга, шунингдек, Зоҳидон ва Исфахон шаҳарларидаги иккита қамоқхонага қарши киритилган. Давлат департаментига кўра, ушбу ахлоқ тузатиш муассасалари суддан ташқари қатл ва ўзбошимчалик билан ҳибсга олишлар учун жавобгардир.
Изоҳ (0)