Yangi Zelandiya hukumati kelajak avlodlar uchun tamaki mahsulotlarini sotish va yetkazib berishni noqonuniy qilish orqali chekishni taqiqlash to‘g‘risidagi rejalarini e’lon qildi. Bu haqda Axios nashri xabar berdi.
“Qonun kuchga kirganida 14 yoshga to‘lgan shaxslar uchun qonuniy ravishda tamaki sotib olish imkonsiz bo‘ladi”, — dedi Yangi Zelandiya sog‘liqni saqlash vazirining o‘rinbosari Aysha Verral chekishga qarshi kurash bo‘yicha harakatlar rejasining bir qismi sifatida taklif qilingan qonunni e’lon qilish chog‘ida.
“Ulg‘aygani sari ular va kelajak avlodlar hech qachon qonuniy ravishda tamaki sotib ololmaydi, chunki haqiqat shundaki, chekishni boshlash uchun xavfsiz bo‘lgan yosh chegarasi yo‘q”, — dedi Verral.
SSV vakilining so‘zlariga ko‘ra, chekish “Yangi Zelandiyada aslida oldini olsa bo‘ladigan o‘limning asosiy sababidir, shuningdek, u har to‘rtinchi holatda saraton kasalligini keltirib chiqaradi”.
Verralning aniqlik kiritishicha, tegishli qonun loyihasi 2022-yilda bosh vazir Jasinda Ardernning ko‘pchilik o‘ringa ega bir partiyali Leyboristlar partiyasidan iborat parlamentda taqdim etiladi. Shunday qilib, rejaga ko‘ra, yoshga oid qoida kelgusi yilda qabul qilinadi. BBC News ta’kidlaganidek, bu degani 2008-yildan keyin tug‘ilganlarning hammasi butun umri davomida tamaki mahsulotlarini sotib ololmaydi.
Bundan tashqari, sigaret sotishga ruxsat berilgan 8 mingga yaqin do‘konlar sonini 500 tagacha qisqartirish rejalashtirilgan.
Axios qayd etishicha, Yangi Zelandiya hukumatining maqsadi 2025-yilga borib mamlakatda chekish darajasini 5 foizga kamaytirish va kelajakda bu qaramlikni butunlay yo‘q qilishdir.
BBC News ma’lumotlariga ko‘ra, hozirda Yangi Zelandiya aholisining taxminan 13 foizi chekadi, bu o‘n yil avvalgiga nisbatan 5 foizga kam. Shu bilan birga, mamlakatining tub aholisi bo‘lgan maori xalqi orasida chekish darajasi ancha yuqori — ularning 31 foizga yaqini chekuvchi. Bu odamlar orasida kasallik va o‘lim ko‘rsatkichlari ham yuqori.
Nashrning eslatishicha, 2017-yilda mamlakat hukumati chekuvchilarga tamakini tashlashga yordam berish maqsadida elektron sigaret — veyplardan foydalanishga ruxsat bergan. Sog‘liqni saqlash rasmiylarining ta’kidlashicha, veyplar sigaretalar kabi zararli emas. Shu bilan birga, ko‘plab mutaxassislar tadqiqot jarayonida elektron sigaretlar uchun ishlatiladigan suyuqliklarda xavfli va saratonga olib keladigan komponentlar borligini aniqlagan.
Izoh (0)