Isroil bosh vaziri Naftali Bennet siyosiy raqiblari va oddiy fuqarolar tomonidan tanqid qilindi, bunga uning rafiqasi va bolalari hukumatning koronavirus yangi shtammi tarqalishi fonida mamlakatni tark etmaslik haqidagi chaqiriqlariga qaramay, 2-dekabr kuni xorijga uchib ketgani sabab bo‘ldi, deb yozmoqda Associated Press.
Bennetning o‘zi Facebook’dagi postida uning oilasi amaldagi qoidalarni buzmaganini ma’lum qildi. Bosh vazirning so‘zlariga ko‘ra, dastlab uning rafiqasi va bolalari borishni rejalashtirgan mamlakat keyinroq isroilliklar uchun yopilib qolgan, shu sababli ular rejalarini o‘zgartirishga majbur bo‘lgan. Bennet tanqidga xayrixoh ekanini aytdi va xorijdan qaytgach butun oila a’zolarining karantindan o‘tishiga ishontirdi.
Agentlikning qayd etishicha, Bennetdan avvalgi bosh vazir Benyamin Netanyaxu ham xuddi shunday vaziyatga tushib qolgan, u Fisih bayramini birga yashamaydigan qarindoshlari bilan bir uyda nishonlashga qaror qilgan, ammo o‘sha paytda hukumat bayramlarda aloqalar sonini kamaytirishni tavsiya qilgandi.
Koronavirusning yangi “omikron” shtammi tarqala boshlagcha Isroil dunyoda birinchi bo‘lib chet elliklar uchun chegaralarini yopdi va fuqarolariga ba’zi Afrika mamlakatlariga borishni taqiqladi. Biroq, isroilliklar boshqa xorijiy davlatlarga chiqishi mumkin, ular qaytib kelganida karantinga rioya qilishi zarur.
Koronavirusning ko‘p sonli mutatsiyaga ega yangi “omikron” (B.1.1.529) shtammi birinchi marta noyabr oyida Janubiy Afrikada topilgandi. Jahon sog‘liqni saqlash tashkiloti ma’lumotlariga ko‘ra, B.1.1.529 virusi organizmdagi protein tarkibiga ta’sir ko‘rsatishi mumkin. Amaldagi vaksinalar esa bu kabi o‘zgarishlarga yetarlicha samarador bo‘lmasligi aytilmoqda. Shuningdek, JSSTda mavjud dastlabki ma’lumotlarga ko‘ra, ilgari koronavirusni boshdan o‘tkazgan kishilarda “omikron” bilan qayta kasallanish xavfi yuqori bo‘lishi mumkin.
Koronavirusning yangi shtammi so‘nggi kunlarda 20 dan ortiq mamlakatda qayd etilgan.
Izoh (0)