Koronavirusining yangi “omikron” shtammi bilan kasallanish holatlari 20 ga yaqin mamlakat va hududda qayd etildi. Bu haqda CNN xabar berdi.

Foto: Trend.az

Atigi bir kun ichida ushbu shtamm Ispaniya, Avstriya, Yaponiyaga hamda Fransiyaning xorijiy hududi bo‘lgan Reyunion oroliga yetib borgan.

“Omikron” bilan kasallanish holatlari avvalroq Avstraliya, Belgiya, Botsvana, Kanada, Chexiya, Daniya, Germaniya, Gonkong, Isroil, Italiya, Niderlandiya, Portugaliya, Janubiy Afrika, Shvetsiya, Buyuk Britaniyada aniqlangan edi.

Koronavirusning ko‘p sonli mutatsiyaga ega yangi “omikron” (B.1.1.529) shtammi birinchi marta noyabr oyida Janubiy Afrikada topilgandi. Jahon  sog‘liqni saqlash tashkiloti ma’lumotlariga ko‘ra, B.1.1.529 virusi organizmdagi protein tarkibiga ta’sir ko‘rsatishi mumkin. Amaldagi vaksinalar esa bu kabi o‘zgarishlarga yetarlicha samarador bo‘lmasligi aytilmoqda. Shuningdek, JSSTda mavjud dastlabki ma’lumotlarga ko‘ra, ilgari koronavirusni boshdan o‘tkazgan kishilarda “omikron” bilan qayta kasallanish xavfi yuqori bo‘lishi mumkin.

Qozog‘iston “omikron” shtammi sabab 3-dekabrdan Afrikaning bir nechta mamlakati va Gonkongdan keladigan fuqarolarning mamlakatga kirishini cheklamoqda. Isroil ushbu shtammning tarqalishining oldini olish maqsadida dunyoda birinchi bo‘lib chet el fuqarolari uchun o‘z chegaralarini yopib qo‘ygan edi.

O‘zbekistonda Sanitariya-epidemiologik osoyishtalik va jamoat salomatligi xizmati boshlig‘i o‘rinbosari, tibbiyot fanlari doktori, professor Nurmat Otabekov “omikron” shtammi bo‘yicha o‘z fikrlarini bildirgan.

“Viruslar — oddiy, hujayrasiz organizmlar. Ularda o‘zgaruvchanlik yuzaga kelishi tabiiy hol. Masalan, hozirgacha koronavirusning qo‘zg‘atuvchisi, ya’ni SARS-CoV-2 ning 7 mingdan ziyod mutatsiyaga uchragan shtammlari aniqlagan. ‘Omikron’ ham shulardan biri”, — dedi mutaxassis.

“Vaksinalar SARS-CoV-2 ning har qanday mutatsiyaga uchragan shtammida samara beradi. Hatto yangi shtammni yuqtirib olgan holatda ham, barcha dozada emlanganlarda kasallik yengil va jiddiy asoratlarsiz o‘tadi”, — deya qo‘shimcha qilgan Otabekov.