Исроил бош вазири пандемия шароитида оила аъзоларининг хорижга сафари туфайли танқидга учради

Исроил бош вазири Нафтали Беннет сиёсий рақиблари ва оддий фуқаролар томонидан танқид қилинди, бунга унинг рафиқаси ва болалари ҳукуматнинг коронавирус янги штамми тарқалиши фонида мамлакатни тарк этмаслик ҳақидаги чақириқларига қарамай, 2 декабрь куни хорижга учиб кетгани сабаб бўлди, деб ёзмоқда Associated Press.

Беннетнинг ўзи Facebook’даги постида унинг оиласи амалдаги қоидаларни бузмаганини маълум қилди. Бош вазирнинг сўзларига кўра, дастлаб унинг рафиқаси ва болалари боришни режалаштирган мамлакат кейинроқ исроилликлар учун ёпилиб қолган, шу сабабли улар режаларини ўзгартиришга мажбур бўлган. Беннет танқидга хайрихоҳ эканини айтди ва хориждан қайтгач бутун оила аъзоларининг карантиндан ўтишига ишонтирди.

Агентликнинг қайд этишича, Беннетдан аввалги бош вазир Бенямин Нетаньяху ҳам худди шундай вазиятга тушиб қолган, у Фисиҳ байрамини бирга яшамайдиган қариндошлари билан бир уйда нишонлашга қарор қилган, аммо ўша пайтда ҳукумат байрамларда алоқалар сонини камайтиришни тавсия қилганди.

Коронавируснинг янги «омикрон» штамми тарқала бошлагча Исроил дунёда биринчи бўлиб чет элликлар учун чегараларини ёпди ва фуқароларига баъзи Африка мамлакатларига боришни тақиқлади. Бироқ, исроилликлар бошқа хорижий давлатларга чиқиши мумкин, улар қайтиб келганида карантинга риоя қилиши зарур.

Коронавируснинг кўп сонли мутацияга эга янги «омикрон» (B.1.1.529) штамми биринчи марта ноябрь ойида Жанубий Африкада топилганди. Жаҳон  соғлиқни сақлаш ташкилоти маълумотларига кўра, B.1.1.529 вируси организмдаги протеин таркибига таъсир кўрсатиши мумкин. Амалдаги вакциналар эса бу каби ўзгаришларга етарлича самарадор бўлмаслиги айтилмоқда. Шунингдек, ЖССТда мавжуд дастлабки маълумотларга кўра, илгари коронавирусни бошдан ўтказган кишиларда «омикрон» билан қайта касалланиш хавфи юқори бўлиши мумкин.

Коронавируснинг янги штамми сўнгги кунларда 20 дан ортиқ мамлакатда қайд этилган.