Korrupsiya mojarosi tufayli iste’foga chiqqan Avstriyaning sobiq kansleri Sebastyan Kurs tez orada Avstriya Xalq partiyasi (AXP) raisligini topshirishi va milliy siyosatdan butunlay ketishini e’lon qiladi. Bu haqda Bild va Kronen Zeitung nashrlariga tayanib, “RBK” xabar berdi. Kronen Zeitung manbalariga ko‘ra, Kurs o‘g‘li tug‘ilgandan keyin shunday qarorga kelgan.
AXP sobiq kanslerning o‘zi bir necha soat ichida rasmiy bayonot berishini ma’lum qilgan. Partiya raisi sifatida Kursning o‘rnini Ichki ishlar vaziri Karl Nexammer egallashi mumkin, deydi Kronen Zeitung manbalari.
Sebastyan Kurs 2017-yilning dekabrida Avstriya Vazirlar Mahkamasini boshqarishga kirishgandi. 2021-yilning oktabr oyida u korrupsiya mojarosi tufayli iste’foga chiqdi. Tergov Kurs va uning eng yaqin sheriklarini korrupsiya va ishonchni suiiste’mol qilishda aybladi. Kanslerning atrofidagi odamlar Österreich gazetasiga pora berib, Avstriya xalq partiyasi haqida ijobiy fikrlardan iborat so‘rovnomalar haqida yozishni so‘raganlikda gumon qilindi. Tergov versiyasiga ko‘ra, mansabni suiiste’mol qilish 2016—2018-yillarda amalga oshirilgan. Mamlakat Moliya vazirligi nashrdagi reklama e’lonlarini moliyalashtirish uchun budjet mablag‘laridan foydalanib, evaziga u yerga material joylashtirishni talab qilgan.
Kursning o‘zi bu ayblovlarni rad etdi. “Moliya vazirligida qanday reklamalar yoki so‘rovnomalar buyurtma qilingani ustidan men rahbarlik qilganimni isbotlovchi mutlaqo hech qanday dalillar yo‘q”, — dedi u. U kansler lavozimini tark etish qarorini “tartibsizlikdan qochish” istagi bilan izohladi.
Avstriya sobiq tashqi ishlar vaziri Aleksandr Shallenberg 11-oktabr kuni Avstriyaning yangi kansleri etib tayinlandi.
Noyabr oyi o‘rtalarida Avstriya Milliy kengashi (parlament quyi palatasi) Kursning deputatlik daxlsizligini bekor qildi. Bu Avstriyaning Iqtisodiy va korrupsiya jinoyatlari bo‘yicha prokuraturasiga siyosatchi ustidan tergovni yakunlash imkonini beradi. Bu qarorni sobiq kanslerin o‘zi ham qo‘llab-quvvatlagan. Uning fikricha, daxlsizlikning olib tashlanishi unga qarshi boshlangan jarayonning tezroq yakunlanishiga yordam beradi.
Izoh (0)