Koronavirusning Janubiy Afrikada paydo bo‘lgani taxmin qilinayotgan “omikron” shtammi bilan kasallanish bo‘yicha Avstraliya, Germaniya, Italiya va Chexiyada ilk holatlar qayd etildi.

Foto: Getty Images

Avstraliya sog‘liqni saqlash xizmatlarining ma’lum qilishicha, COVID-19 ga test topshirgan ikki fuqaroda infeksiyaning yangi turi tasdiqlangan. Gap Janubiy Afrikadan Sidneyga qaytgan sayyohlar haqida ketmoqda.

Germaniyada ham “omikron” shtammi bilan kasallanish bo‘yicha ikkita holat tasdiqlangan. Xususan, ushbu holatlar Myunxen aeroportida aniqlangan. Rasmiylar infeksiya yuqtirganlarning qaysi davlatdan kelganiga aniqlik kiritmagan. Shuningdek, yangi shtamm Mozambikdan Italiyaning Milan shahriga  kelgan erkakda ham topilgan.

Chexiya Respublikasida “omikron” Namibiyada bo‘lib qaytgan ayoldan aniqlangan. Chexiya telekanali xabar berishicha, ayol ilgari koronavirusga qarshi emlangan. Kasallik yengil o‘tmoqda.

Isroil hukumati koronavirusning yangi shtammi tarqalishini oldini olish maqsadida barcha chet el fuqarolari uchun mamlakatga kirishni vaqtincha taqiqladi. Isroil bunday chorani e’lon qilgan dunyodagi birinchi davlatga aylandi, deb yozadi “Yediot Axronot” nashri. Chet elliklarning Isroilga kirishiga qo‘yilgan taqiq 29-noyabrdan boshlab ikki hafta davomida amal qiladi.

Xorijdan qaytgan Isroil fuqarolari uch kunlik karantindan o‘tishi kerak. Shuningdek, favqulodda choralar amalda bo‘lgan vaqt davomida isroilliklarga Afrikaning “qizil zona” deb ataluvchi 50 ta davlatiga borish taqiqlandi.

Hozirda Isroilda “omikron” shtammiga chalinish bo‘yicha bitta holat — Malavidan uchib kelgan ayolda tasdiqlangan. Ushbu shtammni yuqtirishda gumon qilinayotgan yana yetti nafar fuqaro tekshiruvdan o‘tkazilmoqda.

Saudiya Arabistoni Ichki ishlar vazirligi 28-noyabrdan boshlab Malavi, Zambiya, Madagaskar, Angola, Seyshel orollari, Mavrikiy va Komor orollariga parvozlarni to‘xtatdi. Bungacha mamlakat Janubiy Afrika, Namibiya, Botsvana, Zimbabve, Mozambik, Lesoto va Esvatiniga borish-kelish reyslarini to‘xtatib qo‘ygandi.

Maldiv orollari ham yangi shtamm sababli 28-noyabrdan boshlab Afrikaning yuqorida aytib o‘tilgan yettita davlatidan sayyohlarning kelishini taqiqladi. Ushbu mamlakatlardan Maldiv orollariga so‘nggi ikki kun ichida kelganlar ikki haftalik karantindan o‘tishi kerak, deyiladi mahalliy sog‘liqni saqlash vazirligi bayonotida.

Bundan tashqari, Rossiya 28-noyabrdan boshlab Janubiy Afrika, Gonkong, Botsvana, Lesoto, Namibiya, Zimbabve, Mozambik, Madagaskar, Esvatini va Tanzaniyadan keluvchi xorijliklarning mamlakatga kirishini chekladi. Rossiyaning Tanzaniya bilan to‘g‘ridan to‘g‘ri reyslari yoz oylaridan beri to‘xtatilgan edi, ushbu cheklov 2022-yil 1-fevralgacha cho‘zildi.

Koronavirusning ko‘p sonli mutatsiyaga ega yangi “omikron” (B.1.1.529) shtammi birinchi marta noyabr oyida Janubiy Afrikada topilgandi. JSST ma’lumotlariga ko‘ra, B.1.1.529 virusi organizmdagi protein tarkibiga ta’sir ko‘rsatishi mumkin. Amaldagi vaksinalar bu kabi o‘zgarishlarga yetarlicha samarador bo‘lmasligi aytilmoqda.