Fransiya prezidenti Emmanuel Makron Buyuk Britaniya bosh vaziri Boris Jonsonni masxaraboz deb atadi, u bilan ishlashni esa sirkka qiyosladi. Bu haqda Fransiyaning har haftada chiqadigan Canard Enchaine satirik jurnaliga tayanib, “RIA Novosti” xabar berdi.
Nashrning yozishicha, Makron bu haqda 24—25-noyabr kunlari Xorvatiyaga tashrifi chog‘ida gapirgan. Sky News telekanaliga ko‘ra, Fransiya prezidenti o‘z tashrifini Pa-de-Kale suvlarida muhojirlarni olib ketayotgan qayiq cho‘kib, 27 kishi halokat qurboniga aylanganidan bir necha soat o‘tib boshlagan. Britaniya bosh vaziri matbuot xizmati 24-noyabr kuni Jonson va Makron muhojirlarning La-Mansh bo‘ylab noqonuniy suzib o‘tishiga chek qo‘yish uchun hamma chorani ko‘rishga kelishib olganini ma’lum qildi.
“Biz kattalar suhbatini olib boramiz, biroq u (Jonson) bilan gaplashish bundan oldin ham keyin ham men uchun bema’nidek tuyuladi. Doim bir xil sirk. Bunday ajoyib mamlakatni masxaraboz rahbarligi ostida ko‘rish juda achinarli”, — deya Makronning so‘zlaridan iqtibos keltirilgan Canard Enchaine maqolasida.
Canard Enchaine — satira yo‘nalishidagi fransuz haftalik jurnali bo‘lib, u o‘zining jurnalistik surishtiruvlari bilan mashhur. Xususan, nashr 2017-yilgi prezidentlik kampaniyasi vaqtida sobiq bosh vazir Fransua Fiyonning rafiqasi sakkiz yil davomida uning soxta parlament yordamchisi sifatida maosh olib kelganini yozgan. Bu sud muhokamalariga sabab bo‘ldi, natijada Fiyon davlat mablag‘larini o‘zlashtirganlikda aybdor deb topildi va besh yilga (uch yili shartli) ozodlikdan mahrum qilindi.
Eslatib o‘tamiz, 24-noyabr kuni Fransiya qirg‘oqlari yaqinida ichida bir necha o‘nlab muhojirlar bo‘lgan puflama qayiq cho‘kib ketgandi. Fransiyadan Buyuk Britaniyaga yo‘l olgan muhojirlar ushbu qayiq yordamida La-Mansh bo‘g‘ozidan o‘tishga uringan. Halokatga uchraganlarning ayrimlari Fransiya sohil xizmatlari tomonidan qutqarilgan bo‘lsa-da, ulardan 27 nafari cho‘kib ketgan. BBC xabariga ko‘ra, qurbonlar orasida uch nafar bola ham bor. Bu voqea Parij va London o‘rtasida Fransiyadan Buyuk Britaniyaga suzib o‘tayotgan muhojirlar masalasini qanday hal qilish borasida bir necha yillardan beri davom etayotgan bahsni avj oldirgan.
Izoh (0)