Avstraliya federal parlamenti mamlakatda inson huquqlarini buzish, kiberjinoyatchilik va korrupsiyada gumon qilinganlarga qarshi shaxsiy sanksiyalar qo‘llash imkonini beruvchi yangi qonunni ikki o‘qishda qabul qildi. Bu haqda Avstraliya tashqi ishlar vaziri Maris Peynga tayanib, “TASS” xabar berdi.
Qayd etilishicha, “Magnitskiy aktiga asoslangan qonun” deb nom olgan qonun loyihasi Senatda ma’qullangandan so‘ng darhol Vakillar palatasi tomonidan ham bir ovozdan qabul qilingan. Bu mamlakat rasmiylariga nafaqat “inson huquqlarining jiddiy va qo‘pol buzilishida, korrupsiyada va xakerlikda” aybdor deb hisoblangan shaxslarni o‘z hududiga kiritmaslik, balki ularning mahalliy aktivlarini musodara qilish imkonini beradi.
Avstraliya tashqi ishlar vaziri Maris Peynning so‘zlariga ko‘ra, yangi qonunchilik, shuningdek, hukumatga “qayerda yuzaga kelishidan qat’i nazar, xalqaro ahamiyatga molik masalalarga o‘z vaqtida javob berish” imkonini beradi.
“Ushbu jinoyatlarda aybdorlar va ulardan manfaat ko‘ruvchilarning mamlakatimizga va iqtisodiyotimizga kirishini to‘sib qo‘yish orqali biz ular demokratiyamiz taqdim etgan erkinliklardan foydalana olmasligini va Avstraliya bunday odamlar va tashkilotlar uchun boshpana bo‘lib qolmasligini ta’minlaymiz”, — dedi Peyn.
Shuningdek, yangi qonun Amerikaning “Magnitskiy akti” tamoyillariga asoslangani, biroq avstraliyalik qonunchilar unda “Avstraliya manfaatlariga daxldor zararli kiberfaoliyat bilan shug‘ullanuvchi shaxslar”ga qarshi sanksiyalar qo‘llash imkoniyatini ham qamrab olgani xabar qilingan. Senator Kimberli Kitchingning so‘zlariga ko‘ra, endi “qanday odamlar yomonlik qilishi haqida tushuncha mavjud” ekan, “noqonuniy daromadlarini himoya qilish uchun demokratik institutlardan foydalanishga intilayotgan”larga hukumat sanksiyalar qo‘llashdan tortinmasligi kerak. Kelasi hafta parlamentning hukumatga “boshqa mamlakatlar sanksiyalari ostida bo‘lgan shaxslarning ishlarini o‘rganish va Avstraliya ham ularga cheklovlar kiritishi kerakmi yoki yo‘qligini aniqlash bo‘yicha taklif bilan chiqishi kutilmoqda.
“Sergey Magnitskiy nomidagi qonun ustuvorligi va javobgarlik to‘g‘risidagi akt” AQShda 2012-yilda qabul qilingan. Unda Vashington nazdida mamlakatda inson huquqlari buzilishida aybdor bo‘lgan Rossiya rasmiylariga nisbatan bir tomonlama sanksiyalar qo‘llanilishi nazarda tutilgan. 2016-yilda Qo‘shma Shtatlar “Inson huquqlari to‘g‘risida Magnitskiy nomidagi global akt”ni qabul qildi, u “Magnitskiy qonuni”ni nafaqat Rossiyaga, balki boshqa mamlakatlarga ham qo‘llash imkoniyatini ko‘zda tutadi.
Izoh (0)