Alisher Usmonovga tegishli USM kompaniyasi VK’dagi aksiyalari ulushini sotdi

Tadbirkor Alisher Usmonovga tegishli USM xoldingi Rossiya ijtimoiy tarmoqlarining eng katta qismiga egalik qiluvchi VK (sobiq Mail.ru Group) korporatsiyasidagi barcha — 57 foiz ulushini “Sogaz” sug‘urta kompaniyasi guruhiga sotdi. Bu haqda USM matbuot xizmatiga tayanib, Forbes xabar berdi.

Xolding VK ovoz berish aksiyalarining 57,3 foizini nazorat qiluvchi “MF Texnologiy” ustav kapitalidagi ishtiroki bilan VK aksiyalari paketiga egalik qilardi. “MF Texnologiy” kompaniyasining 45 foizi “Megafon” orqali USM’ga tegishli edi. Mazkur 45 foiz ulush va u bilan birga VK kapitalidagi barcha aksiyalar paketi “Sogaz” guruhiga sotilgan. Bitim summasi oshkor etilmagan.

USM press-relizda Usmonovning so‘zlaridan iqtibos keltirgan, “uch yil oldin men va hamkorlarim VK aksiyalarimiz bilan ovoz berish huquqini uning rahbariyatiga o‘tkazgan edik”, — deb ta’kidlagan milliarder.

Tadbirkorning so‘zlariga ko‘ra xolding VK kapitalidan chiqmoqda, lekin “uni auditoriya soni bo‘yicha ham, moliyaviy ko‘rsatkichlar bo‘yicha ham eng yuqori cho‘qqida qoldirmoqda”.

“MF Texnologiy” — raqamli iqtisodiyotda strategik ahamiyatga ega loyihalarni amalga oshirish bo‘yicha qo‘shma korxona. U 2018-yilda “MegaFon”, “Gazprombank”, USM kompaniyalari hamda “Rostex” sho‘ba korxonasi bo‘lgan “RT-Razvitiye Biznesa” ishtirokida tashkil etilgan.

Noyabr oyida “MF Texnologiy” aksiyadorlaridan biri o‘zgargani ma’lum bo‘ldi. “Sber” kompaniya aksiyalarining 36 foizini “Gazprombank”ga 12,8 milliard rublga sotganini e’lon qildi.

“SPARK-Interfaks” ma’lumotlariga ko‘ra, hozirda “MF Texnologiy” kompaniyasining 45 foizi “Sogaz”ga, 36 foizi “Gazprombank”ga va 10 foizi “RT-Razvitiye Biznesa” kompaniyasiga tegishli.