Amerikaning Merriam-Webster izohli lug‘ati 2021-yil so‘zi sifatida “vaksina”ni tanladi. Bu haqda lug‘at saytida e’lon qilingan.
“So‘zlar kundalik foydalanishda bayonotlar, g‘oyalar, intilishlar va noaniqliklarni bildiruvchi vositadir. Lekin ular mafkuraviy nizo vositasiga ham aylanishi mumkin. 2021-yilda ‘vaksina’ bilan aynan shunday bo‘ldi”, — deyiladi Merriam-Webster saytida.
Ta’kidlanishicha, hozirgi davrning eng yirik ilmiy tarixi siyosiy ziddiyat va bahs-munozaralarga aylangan, har ikkisining markazida “vaksina” so‘zi yotadi.
Merriam-Webster ma’lumotlariga ko‘ra, 2021-yilda “vaksina” so‘zini lug‘at saytidan qidirish 2020-yilga nisbatan 601 foizga, 2019-yilga nisbatan esa 1048 foizga oshgan.
Lug‘at, shuningdek, 2021-yilda o‘ziga e’tiborni kuchaytirgan yana 10 ta so‘zni keltirib o‘tgan. Bular Insurrection (Isyon), Perseverance (Qat’iyatlilik), Woke (Sergak), Nomad (Ко‘chmanchi), Infrastructure (Infrastruktura), Cicada (Sikada hasharoti), Murraya (Murraya o‘simligi), Cisgender (Sisgender), Guardian (Qo‘riqchi) va Meta.
2020-yilda Merriam-Webster tuzuvchilari “pandemiya” so‘zini yil so‘zi deb atagandi.
2021-yilda ingliz tilining Kembrij lug‘ati “perseverance” so‘zini, Oksford lug‘ati esa “vax” so‘zini yil so‘zi deb tanlagan. Rossiyada “Sputnik”, “Afg‘oniston” va “Shimoliy oqim” 2021-yilda eng ko‘p qo‘llangan so‘zlar deb topilgan.
Izoh (0)