Tojikistonning Tog‘li Badaxshon avtonom viloyati ma’muriy markazi bo‘lgan Xorug‘ shahrida to‘rt kun davom etgan norozilik aksiyasi yakuniga yetdi, hokimiyat va namoyishchilar o‘rtasida kelishuvga erishildi. Bu haqda avtonom viloyat raisining matbuot kotibi G‘olib Niyatbekov Asia-Plus’ga ma’lum qildi.
Matbuot kotibining so‘zlariga ko‘ra, kelishuvga erishilgach, namoyishchilar tarqagan, hokimlik vakillari va ko‘ngillilar markaziy maydonni tartibga keltirishgan.
“Namoyishchilarning taklif va talablari qabul qilindi va ular maydonni tark etdi. Ularning asosiy talabi Gulbiddin Ziyobekovning qotilini javobgarlikka tortish edi. Rais topshirig‘iga ko‘ra, maxsus komissiya tuzilib, tergov boshlandi”, — deya qo‘shimcha qildi G‘olib Niyatbekov.
U muzokaralar va erishilgan kelishuv tafsilotlarini oshkor qilmagan, biroq viloyat raisi Alisher Mirzonabotning lavozimidan chetlatilishi haqidagi mish-mishlar asossiz ekanini qayd etgan. Avvalroq ijtimoiy tarmoqlarda Mirzonabot ishdan bo‘shatilib, Sug‘d viloyati bo‘yicha Ichki ishlar vazirligi boshqarmasi boshlig‘i Abdullo Navjuvonov tayinlangani haqida xabarlar tarqalgan edi.
Ayni vaqtda, muzokaralarda ishtirok etgan manbaning Asia-Plus’ga xabar berishicha, “hokimiyat 2018-yildan buyon bu yerda faoliyat yuritayotgan barcha harbiy xizmatchilarni hamda Xorug‘dagi voqeadan so‘ng tashkil etilgan qo‘shimcha postlarni olib tashlashga va internet aloqasini tiklashga va’da bergan”.
“Ammo Xorug‘da haliyam internet yo‘q”, — deya qo‘shimcha qildi manba.
Avvalroq nashrning Xorug‘dagi manbalari bergan xabarga ko‘ra, namoyishchilar, shuningdek, organ xizmatlariga mahalliy aholi orasidan kadrlar tayinlashni, tartib va qonuniylikni ta’minlash bo‘yicha idoralararo shtabni (2018-yilda tashkil etilgan) tarqatib yuborishni va Alisher Mirzonabotovni lavozimidan chetlashtirishni talab qilgan. Mirzonabotov Gulbiddin Ziyobekovni qo‘lga olish bo‘yicha operatsiyani o‘tkazishda aybdor deb hisoblanmoqda.
Bu orada NIAT “Xovar”ning Tog‘li Badaxshondagi Xavfsizlik va jamoat tartibini saqlash bo‘yicha idoralararo shtabga tayanib, xabar berishicha, viloyatda “prokuratura vakolatiga kiradigan masalalar fuqarolik jamiyati vakillari bilan hamkorlikda Tojikiston Respublikasi qonunchiligiga muvofiq tekshirilib, baholanadi va hal etiladi”.
Shuningdek, shahardagi markaziy prospekt bo‘ylab jamoat transporti harakati yo‘lga qo‘yilgani, savdo va maishiy xizmat ko‘rsatish shoxobchalari o‘z faoliyatini davom ettirayotgani xabar berilgan.
Eslatib o‘tamiz, 25-noyabr kuni Xorug‘ shahri va shahar atrofi aholisi shaharning markaziy maydonida miting boshlagan edi. Ularning talabi Roshtqal’a tumanida yashovchi Gulbiddin Ziyobekovni otib o‘ldirgan organ xodimlarini javobgarlikka tortish bo‘lgan.
Voqea guvohlaridan birining so‘zlariga ko‘ra, 25-noyabr kuni soat 11:30 da Ziyobekovning uyiga huquq-tartibot idoralari vakillari kelgan. Ziyobekovni hibsga olmoqchi bo‘lishganida u qarshilik ko‘rsatgan. Bunga javoban OMON xodimlari o‘t ochishgan. Ziyobekov yaralanib, keyinchalik vafot etgan.
Gulbiddin Ziyobekov bir qator jinoyatlarni — uyushgan guruh tomonidan garovga olish, ijtimoiy, irqiy, milliy, mintaqaviy, diniy (konfessiyaviy) dushmanlikni qo‘zg‘atishni sodir etganlikda ayblanib, qidiruvda bo‘lgan.
Izoh (0)