Американинг Merriam-Webster луғати «вакцина»ни 2021 йил сўзи деб танлади

Американинг Merriam-Webster изоҳли луғати 2021 йил сўзи сифатида «вакцина»ни танлади. Бу ҳақда луғат сайтида эълон қилинган.

«Сўзлар кундалик фойдаланишда баёнотлар, ғоялар, интилишлар ва ноаниқликларни билдирувчи воситадир. Лекин улар мафкуравий низо воситасига ҳам айланиши мумкин. 2021 йилда ‘вакцина’ билан айнан шундай бўлди», — дейилади Merriam-Webster сайтида.

Таъкидланишича, ҳозирги даврнинг энг йирик илмий тарихи сиёсий зиддият ва баҳс-мунозараларга айланган, ҳар иккисининг марказида «вакцина» сўзи ётади.

Merriam-Webster маълумотларига кўра, 2021 йилда «вакцина» сўзини луғат сайтидан қидириш 2020 йилга нисбатан 601 фоизга, 2019 йилга нисбатан эса 1048 фоизга ошган.

Луғат, шунингдек, 2021 йилда ўзига эътиборни кучайтирган яна 10 та сўзни келтириб ўтган. Булар Insurrection (Исён), Perseverance (Қатъиятлилик), Woke (Сергак), Nomad (Кўчманчи), Infrastructure (Инфраструктура), Cicada (Сикада ҳашароти), Murraya (Муррая ўсимлиги), Cisgender (Сисгендер), Guardian (Қўриқчи) ва Meta.

2020 йилда Merriam-Webster тузувчилари «пандемия» сўзини йил сўзи деб атаганди.

2021 йилда инглиз тилининг Кембриж луғати «perseverance» сўзини, Оксфорд луғати эса «vах» сўзини йил сўзи деб танлаган. Россияда «Спутник», «Афғонистон» ва «Шимолий оқим» 2021 йилда энг кўп қўлланган сўзлар деб топилган.