Tbilisi shahar sudida 29-noyabr kuni Gruziyaning sobiq prezidenti Mixail Saakashvili ustidan sud jarayoni boshlandi. Bu Saakashvili ishtirokida olib borilayotgan birinchi sud majlisi, deb yozadi “Izvestiya”.
“Gazeta.ru”ning xabar berishicha, Saakashvili sudda prokuratura va Gruziya adliyasining ayblovlarini tan olmasligini bildirdi. Sobiq prezidentning advokati Shota Tutberidze sud zalidan translyatsiya olib bordi.
“Men prokuratura va Gruziya adliyasining ayblovini tan olmayman. Men bu yerga oldindan yozilgan komediyaning bir qismiga aylanish uchun kelganim yo‘q”, — dedi Gruziyaning sobiq rahbari.
Saakashvili ustidan sud majlisi 2007-yil 7-noyabrdagi mitingni zo‘ravonlik bilan tarqatib yuborish va “Imedi” telekompaniyasi ofisini vayron qilish ishi bo‘yicha bo‘lib o‘tmoqda.
29-noyabr kuni Saakashvilini qo‘llab-quvvatlash uchun Tbilisi shahar sudi binosi oldiga yuzlab namoyishchilar yig‘ilgan. Saakashviliing tarafdorlari sud binosi oldidagi yo‘lning ikki tomonini to‘sib qo‘ygan. Agmashenebeli prospektida ham harakatlanish cheklangan.
Tartibsizliklar boshlangach, politsiya namoyishchilarni hududni tark etishga majbur qilgan, shundan so‘ng ular Agmashenebeli prospektiga ko‘chgan. Politsiya namoyishchilarga qarshi ko‘zni yoshlatuvchi gaz ishlatgan. Bir necha kishi jarohatlangan.
Shuningdek, politsiya Tbilisining sobiq meri Gigi Ugulavani sud bo‘lib o‘tayotgan bino tashqarisida huquq-tartibot idoralari xodimlariga bo‘ysunmagani uchun hibsga olgani xabar qilingan.
Saakashvili 1-oktabr kuni Gruziyada hibsga olinganidan so‘ng ochlik e’lon qilgandi. U 8 yillik muhojirlikdan keyin vataniga qaytib kelishi bilanoq qo‘lga olingan. 10-noyabr kuni Tbilisida Saakashvili ustidan sud jarayoni boshlangandi. Biroq Gruziyaning sobiq prezidenti xavfsizlik nuqtayi nazaridan sudga keltirilmagan, shundan so‘ng uning advokati jarayonda ishtirok etishdan bosh tortgan va uchrashuvni boshqa muddatga qoldirishga to‘g‘ri kelgan.
Izoh (0)