27-noyabr kuni Ashxobodda Turkmaniston prezidenti Gurbanguli Berdimuhamedov va Turkiya prezidenti Rajab Toyyib Erdo‘g‘on o‘rtasida muzokaralar bo‘lib o‘tdi. Erdo‘g‘on Turkmanistonga rafiqasi Emine Erdo‘g‘on bilan kelgan. Tashrifni yoritgan turk nashrlari Erdo‘g‘on va Berdimuhamedovlarning birga tushgan suratini e’lon qilgan.
Bu Turkmanistonning birinchi xonimi Ogulgerek Berdimuhamedovaning birinchi rasmiy fotosurati, deb yozadi “Xronika Turkmenistana”.
Turkman ommaviy axborot vositalarida esa Berdimuhamedovaning surati chop etilmadi. Gurbanguli Berdimuhamedovning rafiqasi ziyofat chog‘ida olingan telereportajda kadrga tushib qolgan, lekin operator unga alohida e’tibor qaratmagan.
Gurbanguli Berdimuhamedov teleko‘rsatuvlarda ko‘pincha bolalari va nabiralari davrasida namoyon bo‘ladi, lekin uning rafiqasi har doim kadr ortida qoladi. “Xronika Turkmenistana” xabarida Turkmaniston prezidentining nabiralari bilan navbatdagi qo‘shiqni yozayotgani tasvirlangan video ilova qilingan.
Eslatib o‘tamiz, Qirg‘iziston prezidentining rafiqasi Aygul Japarova birinchi xonim maqomini olganidan keyingi ilk xorijiy safarini Turkiyaga uyushtirgan edi. Tashrif davomida Aygul Japarovaning Anqaradagi Chingiz Aytmatov nomidagi forumga qatnashgani, Turkiya birinchi xonimi Emine Erdo‘g‘on bilan birga qirg‘iz yozuvchisi ijodiga bag‘ishlangan ko‘rgazmani tomosha qilgani aks etgan fotosuratlar e’lon qilingandi.
Mavzuga doir:
- Berdimuhamedov Turkmanboshi shahrida amaldorlar bilan mini-futbol o‘ynadi (video)
- Turkmaniston prezidenti to‘pponchadan o‘q otish mahoratini namoyish etdi
- Gurbanguli Berdimuhamedov o‘g‘liga budjet daromadlarini ko‘paytirishni buyurdi, moliya vaziriga esa hayfsan berdi
- Berdimuhamedov yangi avtotrassaning bir qismini ochib berib, unda yangi “KamAZ”ni sinovdan o‘tkazdi (foto)
Izoh (0)