Jahon sog‘liqni saqlash tashkiloti (JSST) 28-noyabr kuni bayonot e’lon qildi, unda koronavirusning yangi “omikron” shtammi haqidagi barcha so‘nggi ma’lumotlar keltirilgan, deb yozadi Meduza.
Unda aytilishicha, JSSTda mavjud dastlabki ma’lumotlarga ko‘ra, ilgari koronavirusni boshdan o‘tkazgan kishilarda “omikron” bilan qayta kasallanish xavfi yuqori bo‘lishi mumkin.
“Dastlabki dalillar shuni ko‘rsatadiki, tashvish uyg‘otadigan boshqa shtammlarga qaraganda, “omikron” bilan qayta kasallanish xavfi yuqori bo‘lishi mumkin, ya’ni ilgari COVID-19 dan tuzalgan odamlarda ‘omikron’ni oson yuqtirib olish ehtimoli ko‘proq. Ammo bu boradagi ma’lumotlar cheklangan. Qo‘shimcha ma’lumotlar kelgusi kunlar va haftalarda mavjud bo‘ladi”, — deyiladi tashkilot bayonotida.
Bayonotda, shuningdek, JSST hozircha “omikron”ning yanada yuqumli ekani va koronavirusning boshqa shtammlariga, jumladan, deltaga qaraganda kasallikning og‘irroq shaklini keltirib chiqarishi haqida aniq ma’lumotlarga ega emasligi aytilgan. “Omikron” vaksina immunitetini qanchalik chetlab o‘tishga qodirligi haqida ham ma’lumot yo‘q. Bunga oydinlik kiritish uchun butun dunyoda tadqiqotlar olib borilmoqda, deyiladi xabarda.
Janubiy Afrika olimlari birinchi bo‘lib noyabr oyining oxirida “omikron” shtammi (dastlab ular uni nyu deb atamoqchi bo‘lgan) paydo bo‘lgani haqida xabar bergandi. Ma’lum bo‘lishicha, u juda ko‘p mutatsiyalarga ega, bu esa uni yanada yuqumli va vaksinaga chidamli qilishi mumkin.
Janubiy Afrikadan tashqari, “omikron” allaqachon Gonkong, Avstraliya va bir qator G‘arbiy Yevropa mamlakatlarida ham qayd etildi. Isroil ushbu shtammning tarqalishini oldini olish maqsadida dunyoda birinch bo‘lib chet el fuqarolari uchun o‘z chegaralarini yopib qo‘ydi.
Izoh (0)