Hindistonda yuk mashinasi ishtirokidagi YTH oqibatida 18 kishi halok bo‘ldi

Hindistonning sharqiy qismidagi G‘arbiy Bengaliya shtatida avtomobil va tosh ortilgan yuk mashinasi to‘qnashib ketdi. Oqibatda kamida 18 kishi halok bo‘ldi, yana besh kishi jarohat oldi, deb yozadi “Korrespondent.net”.

Baxtsiz hodisa G‘arbiy Bengaliya ma’muriy markazi — Kalkutta shahridan 164 kilometr shimolda joylashgan Nadiya okrugining Phulbari tumanida sodir bo‘lgan. Krematoriy (marhumning jasadini yoqish)ga ketayotgan motamchilar yo‘l-transport hodisasi qurboniga aylangan. Jabrlanganlar eng yaqin shifoxonaga yetkazilgan.

Dastlabki tergov natijalari shuni ko‘rsatdiki, avtohalokatga ehtiyotsizlik va hududdagi quyuq tuman sabab bo‘lgan bo‘lishi mumkin.

Hindistonda halokatli avariyalar tez-tez uchraydi, odatda ular transport vositalariga ortiqcha yuk ortilishi, yo‘l sharoitlarining yomonligi va ehtiyotsizlik tufayli sodir bo‘ladi. Rasmiy ma’lumotlarga ko‘ra, Hindiston bo‘ylab har yili 500 mingga yaqin YTHda 150 mingga yaqin odam halok bo‘ladi.

Avvalroq Bolgariyada sayyohlik avtobusi YTHga uchrab, yonib ketgandi. Voqea joyida 46 kishi, jumladan, 12 bola halok bo‘lgan. Avgustda Perudagi And tog‘larida avtobus jarlikka qulab tushgan. Oqibatda 15 kishi halok bo‘lgan, uch kishi yaralangan.

Pokistonda esa yo‘lovchi avtobusi yuk mashinasi bilan to‘qnashib ketgandi. Oqibatda kamida 27 kishi halok bo‘lgan, 30 dan ortiq kishi jarohat olgan.