Buxoro viloyati Kogon shahrida tuproq o‘pirilishi oqibatida 2 kishi halok bo‘ldi, deya xabar qilmoqda Favqulodda vaziyatlar vazirligi.
Ma’lum qilinishicha, 2021-yil 16-noyabr kuni soat 14:50 da Kogon shahar “Do‘stlik” MFY Do‘stlik ko‘chasida “61-avtokorxona” MChJ tomonidan yer 5–6 metr chuqurlikda, eni 3 metr oralig‘ida kovlangan holda 1000 millimetrli suv quvurlari yotqizilayotgan vaqtda chuqurning chap tomoni o‘pirilib, ikki nafar ishchini tuproq va qum bosib qolgan.
Viloyat Favqulodda vaziyatlar boshqarmasi qutqaruvchilari tomonidan voqea joyida olib borilgan tezkor qidiruv ishlari natijasida ikki nafar fuqaroning jasadi tuproq ostidan olib chiqilgan.
Voqea joyiga FVB, IIB, SSB va prokuratura rahbariyati va tezkor-tergov guruhi chiqqan. Mazkur hodisa yuzasidan dastlabki tergov oldi surishtiruv ishlari olib borilmoqda.
Bundan avval Namanganda masjid tahoratxonasi qurilishi vaqtida unga tutash uy darvozaxonasi devori o‘pirilib, tomi qulagani, Xorazmda suv ta’minoti idorasining ikki ishchisi halok bo‘lgani hamda Farg‘onada quduq tozalashga tushgan bir kishi halok bo‘lgani haqida xabar berilgandi.
Izoh (0)