Facebook ijtimoiy tarmog‘ida Namangan shahar Ichki ishlar organlari faoliyatini muvofiqlashtirish boshqarmasi 2-sonli IIB HPB profilaktika inspektori, katta leytenant, 2011–2015-yillarda IIV akademiyasida tahsil olgan, huquqshunos S.O.ning Respublika ichki ishlar vaziri Po‘lat Bobojonovga yo‘llagan videomurojaati tarqaldi.
Unda murojaat egasi ish o‘rnida sodir bo‘layotgan noqonuniy xatti-harakatlar yuzasidan shikoyat qilgan.
Uning videomurojaatda aytgan so‘zlariga ko‘ra, Namangan shahar IIO FMB 2-sonli IIB rahbari, mayor A.S. qo‘l ostidagi profilaktika inspektorlariga har kuni beshtadan ma’muriy bayonnoma tuzish, bir yilda 2 ta ma’muriy nazorat o‘rnatish kabi noqonuniy talablarni reja qilib belgilab bergan. Bu rejalarni bajarmagan xodimlarga ishdan haydash bilan tahdid qilingan. HPB boshlig‘i, podpolkovnik B.I.ga 50 AQSh dollari berilsa, reja bajarilgan deb belgilab qo‘yilgan.
Katta leytenant ushbu murojaatida xodimlarga yuqoridagi kabi jarima “plan”lari belgilab qo‘yilgani, bo‘limda tanish-bilishchilik va qarindosh urug‘chilik, mansabni suiiste’mol qilish kabi noqonuniy harakatlar avj olganini ta’kidlab o‘tadi. Murojaatchining ta’kidlashicha, buyruqni bajarmay o‘z haq-huquqlarini talab qilgan xodimlar kurakda turmaydigan so‘zlar bilan haqoratlanadi va bosim o‘tkaziladi.
Mavzuga doir: Farg‘ona viloyati IIB vazir Po‘lat Bobojonovga videomurojaat yo‘llagan sobiq inspektor to‘g‘risida ma’lumot berdi
Qayd etilishicha, 2021-yil sentabr oyida fuqaro M.Y.ning katta leytenant S.O.ning xatti-harakatlaridan norozi bo‘lib yozgan arizasiga asosan o‘tkazilgan xizmat tekshiruvi davomida katta leytenant S.O. 2021-yil boshlarida Namangan shahrida yashovchi, 1975-yilda tug‘ilgan fuqaro va uning birga yashovchi o‘g‘li, 1994-yilda tug‘ilgan fuqaro va Namangan shahrining Davlatobod tumanida yashovchi, 1982-yilda tug‘ilgan fuqarolarga kredit olib berishni va’da qilib, ishonchiga kirgan.
Ularning shaxsiga oid hujjatlari nusxalarini olib, so‘ng rasmiy hujjatligini bila turib, soxta ma’lumotlar kiritgan Ushbu fuqarolarning nomlariga “Xalq banki” orqali 81 400 000 so‘m kredit olib, ko‘p miqdordagi mulklarini qo‘lga kiritib, o‘zining ehtiyojlari uchun ishlatib yuborgani aniqlangan. Tekshiruv yakuniga ko‘ra 2021-yilda katta leytenant S.O.ni egallab turgan lavozimidan ozod etilishi haqida xulosa qilingan.
Namangan viloyati IIBning xizmat tekshiruvi xulosasi va to‘plangan hujjatlar, aniqlangan holatlarga huquqiy baho berish uchun Namangan shahar prokuraturasiga yuborilgan.
Prokuratura organlari tomonidan o‘tkazilgan tergovga qadar tekshiruv yakuniga ko‘ra, yuqoridagi holat yuzasidan 2021-yil 21-oktabrda Jinoyat kodeksining 168-modda 3-qismi “b, v” bandlari (takroran yoki xavfli retsidivist tomonidan, xizmat mavqeyidan foydalanib sodir etilgan firibgarlik) bilan jinoyat ishi qo‘zg‘atilib, dastlabki tergov harakatlari olib borilmoqda.
Bosh prokuratura matbuot xizmatining xabar qilishicha, Namangan shahar IIB sobiq profilaktika inspektori S.O. boshqa fuqarolarning nomiga olingan jami 81,4 million so‘m kredit mablag‘larini talon-toroj qilgani holati yuzasidan Jinoyat kodeksining 168- va 209-moddalari (mansab soxtakorligi) bilan jinoyat ishi qo‘zg‘atilgan.
Gumonlanuvchi turli bahonalar bilan tergovga kelishdan bosh tortib, yashiringani sababli unga nisbatan sirtdan ayb e’lon qilinib, 13-noyabr kuni sudining ajrimi bilan qamoqqa olish ehtiyot chorasi qo‘llanilgan va unga nisbatan qidiruv e’lon qilingan.
Olib borilgan tezkor qidiruv tadbirlari natijasida 14-noyabr kuni ayblanuvchi ushlanib, himoya huquqlari ta’minlangan holda tergovga jalb qilingan. Hozirda tergov harakatlari olib borilmoqda.
Izoh (0)