Namangan shahar “Zarkent” MFY Axsi ko‘chasida joylashgan “Homiddin qori jome masjidi” uchun tahoratxona qurilish jarayonida devor o‘pirilishi sodir bo‘ldi. Bu haqda viloyat Favqulodda vaziyatlar boshqarmasi xabar qildi.
Oqibatda uning yonidagi 19-berk ko‘cha, 21-A uyning yon devori ham o‘pirilishi tufayli darvozaxonaning tom qismi qulagan.
Hozirda Namangan viloyati Favqulodda vaziyatlar boshqarmasi yong‘in qutqaruv otryadi hamda Namangan shahar favqulodda vaziyatlar bo‘limi yong‘in qutqaruv bo‘limi xodimlari tomonidan qidiruv qutqaruv ishlari olib borilmoqda.
Yuqoridagi holat yuzasidan fuqarolarga jiddiy tan jarohati yetmagan.
Bundan avval Qoraqalpog‘istonda devor bosib qolishi oqibatida 3 kishi halok bo‘lgani hamda Namanganda ikki nafar yollanma ishchi tuproq ostida qolib, halok bo‘lgani yuzasidan jinoyat ishi qo‘zg‘atilgani haqida xabar berilgandi.