Бухоро вилояти Когон шаҳрида тупроқ ўпирилиши оқибатида 2 киши ҳалок бўлди, дея хабар қилмоқда Фавқулодда вазиятлар вазирлиги.
Маълум қилинишича, 2021 йил 16 ноябрь куни соат 14:50 да Когон шаҳар «Дўстлик» МФЙ Дўстлик кўчасида «61-автокорхона» МЧЖ томонидан ер 5–6 метр чуқурликда, эни 3 метр оралиғида ковланган ҳолда 1000 миллиметрли сув қувурлари ётқизилаётган вақтда чуқурнинг чап томони ўпирилиб, икки нафар ишчини тупроқ ва қум босиб қолган.
Вилоят Фавқулодда вазиятлар бошқармаси қутқарувчилари томонидан воқеа жойида олиб борилган тезкор қидирув ишлари натижасида икки нафар фуқаронинг жасади тупроқ остидан олиб чиқилган.
Воқеа жойига ФВБ, ИИБ, ССБ ва прокуратура раҳбарияти ва тезкор-тергов гуруҳи чиққан. Мазкур ҳодиса юзасидан дастлабки тергов олди суриштирув ишлари олиб борилмоқда.
Бундан аввал Наманганда масжид таҳоратхонаси қурилиши вақтида унга туташ уй дарвозахонаси девори ўпирилиб, томи қулагани, Хоразмда сув таъминоти идорасининг икки ишчиси ҳалок бўлгани ҳамда Фарғонада қудуқ тозалашга тушган бир киши ҳалок бўлгани ҳақида хабар берилганди.
Изоҳ (0)