Yaponiya parlamentining quyi palatasi ko‘p ovoz bilan hukmron Liberal-demokratik partiya (LDP) rahbari Fumio Kisidani mamlakatning 101-bosh vaziri etib sayladi. Ovoz berish jarayoni jonli efirda namoyish etildi, deb yozadi “RIA Novosti”.
E’lon qilingan natijalarga ko‘ra, Kisidaning nomzodi uchun 297 nafar deputat ovoz bergan.
Yaponiyada bosh vazir partiyalar ko‘rsatgan nomzodlar orasidan saylanadi. Buning uchun nomzod ko‘pchilikning ovozini qo‘lga kiritishi kerak. Har bir partiya o‘z nomzodini (odatda bu partiya yetakchisi) ko‘rsatadi. Hukmron partiya deputatlarning yarmidan ko‘piga ega ekani sababli Kisidaning qayta saylanishini oldindan aytish mumkin edi.
Yaponiyada 10-noyabr kuni butun hukumat iste’foga chiqdi. Ushbu Vazirlar Mahkamasi 4-oktabrda Fumio Kisida Yaponiyaning 100-bosh vaziri etib saylangani munosabati bilan tuzilgan edi. Biroq 14-oktabrda parlament quyi palatasi vakolat muddati tugashi munosabati bilan tarqatib yuborilgan, 31-oktabrda esa uning yangi tarkibi saylangan.
Vaksinatsiya va iqtisodiy chora-tadbirlardagi xatoliklar tufayli hukmron LDPning parlamentdagi o‘rinlari sezilarli darajada qisqarishi haqidagi prognozga qaramay, u ko‘pchilikning ovozini olishga muvaffaq bo‘ldi.
Saylovlar natijasida LDP 465 deputatlik o‘rnidan 261 tasini qo‘lga kiritdi, natijada u ovozlarning yarmidan ko‘prog‘iga, shuningdek, “mutlaq barqaror ko‘pchilik” nomiga ega bo‘ldi — bu esa LDPga nafaqat parlament quyi palatasi qo‘mitalarining rahbarlarini tayinlash, balki ulardagi o‘rinlarning yarmidan ko‘pini qo‘lga kiritish imkonini beradi.
Fumio Kisida hukumat tepasiga kelishidan avval Yaponiyaning 99-bosh vaziri Yosixide Suga ushbu lavozim uchun keyingi muddatga nomzodini qo‘ymaslikka qaror qilgandi. Natijada Suga boshchiligidagi Vazirlar Mahkamasi 4-oktabr kuni to‘liq tarkibda iste’foga chiqqan.
Izoh (0)