Япония парламентининг қуйи палатаси кўп овоз билан ҳукмрон Либерал-демократик партия (ЛДП) раҳбари Фумио Кисидани мамлакатнинг 101-бош вазири этиб сайлади. Овоз бериш жараёни жонли эфирда намойиш этилди, деб ёзади «РИА Новости».
Эълон қилинган натижаларга кўра, Кисиданинг номзоди учун 297 нафар депутат овоз берган.
Японияда бош вазир партиялар кўрсатган номзодлар орасидан сайланади. Бунинг учун номзод кўпчиликнинг овозини қўлга киритиши керак. Ҳар бир партия ўз номзодини (одатда бу партия етакчиси) кўрсатади. Ҳукмрон партия депутатларнинг ярмидан кўпига эга экани сабабли Кисиданинг қайта сайланишини олдиндан айтиш мумкин эди.
Японияда 10 ноябрь куни бутун ҳукумат истеъфога чиқди. Ушбу Вазирлар Маҳкамаси 4 октябрда Фумио Кисида Япониянинг 100-бош вазири этиб сайлангани муносабати билан тузилган эди. Бироқ 14 октябрда парламент қуйи палатаси ваколат муддати тугаши муносабати билан тарқатиб юборилган, 31 октябрда эса унинг янги таркиби сайланган.
Вакцинация ва иқтисодий чора-тадбирлардаги хатоликлар туфайли ҳукмрон ЛДПнинг парламентдаги ўринлари сезиларли даражада қисқариши ҳақидаги прогнозга қарамай, у кўпчиликнинг овозини олишга муваффақ бўлди.
Сайловлар натижасида ЛДП 465 депутатлик ўрнидан 261 тасини қўлга киритди, натижада у овозларнинг ярмидан кўпроғига, шунингдек, «мутлақ барқарор кўпчилик» номига эга бўлди — бу эса ЛДПга нафақат парламент қуйи палатаси қўмиталарининг раҳбарларини тайинлаш, балки улардаги ўринларнинг ярмидан кўпини қўлга киритиш имконини беради.
Фумио Кисида ҳукумат тепасига келишидан аввал Япониянинг 99-бош вазири Ёсихидэ Суга ушбу лавозим учун кейинги муддатга номзодини қўймасликка қарор қилганди. Натижада Суга бошчилигидаги Вазирлар Маҳкамаси 4 октябрь куни тўлиқ таркибда истеъфога чиққан.
Изоҳ (0)