Yaponiya parlamentining quyi palatasi ko‘pchilik ovoz bilan mamlakat hukmron Liberal-demokratik partiyasi (LDP) rahbari Fumio Kisidani Yaponiyaning 100-bosh vaziri etib sayladi. Avval Kisida tashqi ishlar vaziri bo‘lib ishlagan.

Fumio Kisida

Foto: Reuters

Yaponiyada bosh vazir partiyalar ko‘rsatgan nomzodlar orasidan saylanadi. Buning uchun nomzod ko‘pchilikning ovozini qo‘lga kiritishi kerak. Har bir partiya o‘z nomzodini ko‘rsatadi. Deputatlarning yarmidan ko‘pi LDP a’zolari.

Parlamentning yuqori palatasida hukmron LDP ham ko‘pchilik ovoz oldi. Shu bilan birga, saylovda boshqa nomzod g‘alaba qozongan taqdirda ham, quyi palata tasdiqlagan nomzod bosh vazir bo‘ladi.

Bugun, 4-oktabr kuni Yaponiyada vazirlar “kabineti”ning yangi tarkibi e’lon qilinadi. Vazirlikka nomzodlarni o‘tgan hafta oxirida Kisida ko‘rsatgan edi. Hukumatning 20 a’zosidan 13 nafarini vazirlik lavozmiga birinchi marta kirishayotgan kishilar tashkil etadi. Parlament quyi palatasi vakolat muddati tugashi munosabati bilan tarqatib yuboriladi. Nikkei agentligi xabar berishicha, Kisida parlament quyi palatasi uchun saylovlarni 31-oktabrga belgilamoqchi.

Avvalroq Yaponiya bosh vaziri Yosixide Suga boshchiligidagi hukumat to‘liq tarkibda iste’foga chiqqan edi. Suga koronavirusga qarshi kurashga e’tibor qaratish maqsadida, muddati tugagach, Yaponiya bosh vaziri lavozimiga qayta nomzodini ko‘rsatmaslikka qaror qilgan. “Ham koronavirusga qarshi choralar ishlab chiqish, ham saylov kampaniyasi mendan katta energiya talab qiladi. Men ikkalasini bir vaqtning o‘zida olib borolmayman, shuning uchun bittasini tanlashimga to‘g‘ri keldi”, — deya tushuntirdi u.

Avgust oyi boshida bosh vazir faoliyatini ma’qullash bo‘yicha reyting eng past ko‘rsatkichga (28 foiz) tushib ketgandi. Bu, xususan, mamlakatda bo‘lib o‘tgan Olimpiya o‘yinlari fonida koronavirus delta shtammining tez tarqalishi tufayli ro‘y berdi.

Shu bilan birga, Tokiodagi Milliy siyosiy tadqiqotlar instituti Xarukata Takenaga NBC News telekanaliga ma’lum qilishicha, Olimpiya o‘yinlari bosh vazir lavozimiga ta’sir qilgan bo‘lsa-da, hal qiluvchi omilga aylanmagan.