Rossiyada o‘tgan bir sutkada 1239 kishi koronavirus tufayli vafot etdi. Bu pandemiya boshidan buyon mamlakatda qayd etilgan kunlik o‘limlarning eng yuqori ko‘rsatkichi, deb yozadi Meduza COVID-19 ga qarshi kurash bo‘yicha federal tezkor shtabga tayanib.
Tezkor shtab ma’lumotlariga ko‘ra, Rossiyada koronavirus qurbonlarining umumiy soni 250 454 kishiga yetdi.
O‘tgan kun davomida mamlakatda yana 38 058 kishida COVID-19 aniqlandi — bu 27-oktabrdan beri qayd etilgan eng past ko‘rsatkich. Rossiyada butun pandemiya davrida jami 8 911 713 kishi koronavirus bilan kasallangan, deyiladi tezkor shtab ma’lumotlarida.
Mamlakatda COVID-o‘limlar bo‘yicha bundan avvalgi antirekord 9-noyabr kuni qayd etilgandi — bir kecha-kunduzda 1211 kishi vafot etgan.
Eslatib o‘tamiz, Rossiyada COVID-19 ning yangi to‘lqini yuz bermoqda, bunga koronavirusning delta (“hindcha”) shtammi bilan bog‘liq vaziyat sabab bo‘lgan. Tezkor shtab deyarli har kuni koronavirus bilan kasallanish va o‘lim holatlari bo‘yicha antirekordlar haqida hisobot bermoqda.
Rossiya prezidenti Vladimir Putin mamlakatda koronavirus infeksiyasi bilan kasallanish holatlari ortayotgani sabab 30-oktabrdan 7-noyabrda qadar ishga chiqilmaydigan haftalik deya e’lon qilgan. Ta’til muddati tugadi. Biroq beshta hudud — Novgorod, Tomsk, Chelyabinsk, Smolensk va Kursk viloyatlarida mahalliy hokimiyat dam olish kunlarini uzaytirdi.
Mavzuga doir:
- Rossiyada koronavirus tufayli bir sutkada 1200 dan ortiq kishi vafot etdi. Bu pandemiya boshidan buyon mutlaq rekord
- Rossiya prezidenti koronavirus tufayli restoranlarning tunda ishlashini taqiqladi. 60 yoshdan katta emlanmagan aholiga o‘zini yakkalash buyurildi
- Fotoreportaj: Moskvaliklar lokdaun joriy etilganidan keyingi birinchi dam olish kunini qanday o‘tkazdi?
Izoh (0)