Latviya davlatiga ishga yuborish bilan bog‘liq firibgarlik holatlari aniqlandi.
Ma’lum qilinishicha, Andijon viloyatining Oltinko‘l tumanida yashovchi shaxs xorijda ishlamoqchi bo‘lgan fuqarolarga maslahat va viza olish bo‘yicha zarur hujjatlarni tayyorlashda ko‘maklashish bilan shug‘ullanuvchi MCHJ tashkil qilib, ijtimoiy tarmoqlar orqali Xorazm viloyatining Xazorasp tumanida yashovchi 4 nafar fuqaroning ishonchiga kirgan.
Ularga Latviya davlatiga ishlash uchun borishlarida kerak bo‘ladigan vizani olib berish evaziga 10 ming AQSH dollari talab qiladi. Davlat xavfsizlik xizmati va Ichki ishlar organlari xodimlari hamkorligida Urganch shahrida o‘tkazilgan tezkor tadbirda, u so‘ralgan pul mablag‘ini olgan vaqtida ashyoviy dalillar bilan ushlandi.
Bunday qonunbuzilish holati Toshkent viloyatida ham qayd etilib, unda Angren shahrida yashovchi shaxs Andijon viloyatida yashovchi 3 nafar fuqaroga elchixonada ishlovchi tanishlari orqali Latviyaga borib ishlash imkonini beruvchi ishchi viza rasmiylashtirib berish evaziga 8250 AQSH dollari talab qiladi.
Davlat xavfsizlik xizmati va Bosh prokuratura huzuridagi departament xodimlari hamkorligida Angren shahrida o‘tkazilgan tezkor tadbirda u so‘ralgan pul mablag‘idan 2100 AQSH dollarini oldindan olgan vaqtida ushlandi.
Hozirda mazkur ikki qonunbuzarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Izoh (0)