Neslihan Atagul 32 yoshda: turk kino yulduzi ishtirokidagi eng sara film va seriallar

Bugun iste’dodli aktrisa va model Neslihan Atagul 32 yoshni qarshi oldi. Turk seriallari yulduzining tug‘ilgan kuni munosabati bilan uning filmografiyasi haqida ma’lumot berishni lozim topdik. Quyida Neslihan Atagul ijrosidagi eng qiziqarli film va seriallar syujeti bilan tanishib chiqamiz.

“Xazonrezgi” (2006-2010)

Yosh Neslihan o‘zining birinchi jiddiy rolini “Xazonrezgi” serialida ijro etdi. Undagi hikoyalar Rashod Nuri Guntekin asari asosida yaratilgan. Syujetda ko‘p farzandli er-xotin haqida hikoya qilinadi. Ali Rizo va uning rafiqasi Xayriya kichik shaharchada yashaydi va besh nafar farzandini qattiqqo‘llik bilan tarbiyalaydi. Kunlarning birida oila Istanbulga ko‘chib o‘tishga qaror qiladi, er-xotin qizining katta shaharda o‘qishini davom ettirishini istaydi. Shahardagi hayot tarzi ularga ko‘plab kutilmagan hodisalar va jiddiy qiyinchiliklarni keltirib chiqaradi.

“Ishq sohillari” (2013-2014)

Ushbu loyihada aktrisa hayotdagi bo‘lajak turmush o‘rtog‘i Kadir Do‘g‘ulu bilan birga ishtirok etgan. Serialda Istanbulning qashshoq hududlaridan biri bo‘lgan Fotih tumani aks etadi. Neslihan ana shu yerda yashaydigan Neriman ismli qiz rolini o‘ynaydi. Qahramon erta yoshda onasidan ayrilib, otasi Faizbey hamda xolasi Gulter xonim bilan birga yashaydi. Ularning oilasi kamtarona hayot kechiradi va qadimgi an’analarga doimo rioya qiladi.

Go‘zal Nerimanga bolalikdagi do‘sti oshiq bo‘lib, unga uylanishni orzu qiladi, lekin vaqt o‘tib ularning munosabatlari yomonlasha boshlaydi. Keyinchalik Neriman boshqa yigitni uchratadi va hayoti o‘zgarib ketadi. Neslihan ushbu serialda sodda, shu bilan birga hayotga teran qaraydigan, nimani istashini biladigan qiz rolini ijro qilgan.

“Sendan menga qolgan” (2015)

Elif va O‘zgur oddiy qishloqda tug‘ilib o‘sadi va bolaligida bir-biriga ko‘ngil qo‘yadi, ammo bir kuni O‘zgur Istanbulga ketishga majbur bo‘ladi. U Elifga o‘n kundan keyin qaytib kelishga va’da berdi. Ammo u qariyb o‘n yil o‘tganidan keyingina qaytadi.

Bu vaqt ichida yigit Istanbulda yashab ulg‘ayadi va boyib ketadi: uning chiroyli uyi, mashinalari bo‘ladi. Ammo taqdir taqozosi bilan O‘zgur bolalikdagi birinchi muhabbatini qayta uchratadi...

“Sevgi iztirobi” (2015-2017)

“Emmi” mukofotiga loyiq deb topilgan mazkur serial millionlab muxlislar qalbidan joy olishga muvaffaq bo‘lgan. Neslihan mazkur serialda rassom qiz Nihon rolini o‘ynagan. Boy va kibor oilaning farzandi avtobusda oddiy va sodda yigit Kamol bilan tanishib qoladi, voqealar rivoji shundan keyin boshlanadi. Neslihan gavdalantirgan obraz oilasi, xususan, ukasini deb uni telbalarcha sevadigan, ammo o‘zining zarracha ko‘ngli bo‘lmagan Amirga turmushga chiqishga va 60 qism davomida aziyat chekishiga to‘g‘ri keladi. Neslihan ushbu serialda sevgisiga sodiq, shu bilan birga ukasini deb sevgisini qurbon qiladigan qiz rolini ijro qilgan.

“Tub” (2018)

Sahir o‘z joniga qasd qilishga moyilligi bor odamlar bilan ishlaydi, uning vazifasi falokatlarni oldini olishdan iborat. Faoliyati davomida u xaker qiz bilan tanishadi va ushbu uchrashuv uning ishi va hayoti butunlay o‘zgarib ketishiga sababchi bo‘ladi. Aktrisa kompyuter dahosi Bilge rolini o‘ynaydi va syujetga ko‘ra har qanday parolni buza oladigan mohir IT mutaxassisi bo‘ladi.

Mini serialdagi hikoyalar Bilge tomonidan Sahir ismli odamni qutqargan paytdan boshlanadi. Neslihan ushbu serialda boshqa rollari singari romantik qiz qahramonini jonlantirmagan. Muxlislar “Tub”ni tomosha qilish orqali aktrisaning yangi qirralarini o‘zlari uchun kashf qilishadi.

“Elchining qizi” (2019-2021)

“Elchining qizi”da sevgi uchburchagi va keskin burilishlarni uchratish mumkin. Serial markazida bir-biriga ko‘ngil qo‘ygan ikki yosh turadi. Sanjar va Nare birga bo‘lish uchun barcha narsaga tayyor turadi, ammo qizning otasi bu munosabatlarga qarshi. Juftlik yashirincha turmush qurish uchun qochib ketadi. Biroq ularning birinchi nikoh kechasida jiddiy nizo kelib chiqadi va Sanjar Nareni haydab yuboradi, shundan keyin qiz g‘oyib bo‘ladi.

Yigit tushkunlikka tushadi. U sevgilining xiyonat qilganligiga va boshqaning oldiga ketganiga ishonadi. Aslida esa bari aksincha edi: eng yaxshi ko‘rgan insoni unga ishonch bildirmaganiga dosh berolmay, Nare o‘z joniga qasd qilishga qaror qiladi, lekin omon qoladi. Oradan 9 yil o‘tib Sanjar boshqa qizga uylanishga tayyorgarlik ko‘rayotgan vaqtda uning hayotida o‘tmishdagi muhabbat yana paydo bo‘ladi.

“Oh, Belinda” (2023)

Drama va komediya janridagi “Oh, Belinda” seriali 2023-yilning 7-aprel sanasida tomoshabinlarga taqdim etilgan. Dilyara — yosh aktrisa bo‘ladi, u Belinda shampunining reklama roligini suratga olishga rozi bo‘lgach, hamma narsa o‘zgarib ketadi. Aktrisa ikki farzandi bor uy bekasi rolini ijro etadi va to‘satdan qahramon o‘zini boshqa dunyoda topadi, bu yerda aktrisa reklama qahramonining hayotini boshdan kechiradi, ya’ni hayotidan juda nafratlangan uy bekasining barcha tashvishlari unga tushadi. Film komediya va fantastik janrda suratga olingan.