So‘nggi kunlarda tegajoqlik, shilqimlik, jinsiy zo‘ravonlik holatlariga doir ikki hodisa jamoatchilik e’tiboriga tushdi. Dastlab Toshkent davlat pedagogika universitetining 37 yoshli dekan o‘rinbosari o‘z xonasida talaba qizga tegajoqlik qilgani va oxir-oqibat uni ikkinchi qavatdan itarib yuborgani haqida xabar tarqaldi. Shuningdek, poytaxtda 20 yashar yigit 63 yoshli onaxonga shilqimlik qilgani va uni kaltaklagani haqida xabar qilindi. Har ikkala hodisa yuzasidan jinoyat ishi qo‘zg‘atilgan; dekan o‘rinbosari qamoqqa olingan.
Ayni chog‘da ushbu ikki holat O‘zbekistonda odatda ochiq muhokama qilinmaydigan bu kabi mavzularni kun tartibidagi asosiy masalalardan biriga aylantirdi — ijtimoiy tarmoqlarda shilqimlik va tegajoqlik (xarrasment) atrofidagi munozaralar bir necha kundan beri tinmayapti. Faollarning ta’kidlashicha, bu kabi ayanchli holatlar sanoqli emas; prezidentning to‘ng‘ich qizi Saida Mirziyoyeva ham Pedagogika universitetidagi hodisaga munosabat bildirarkan: “Jamoatchilikka oshkor etilayotgan bu kabi holatlar dengizdan tomchi ekanini barchamiz anglab turibmiz”, — deya ta’kidladi.
“Daryo” o‘z mushtariylarni ular bilan sodir bo‘lgan shilqimlik, tegajoqlik va jinsiy zo‘ravonlikka doir holatlar va bu holatlar ularning hayotiga qanchalik ta’sir ko‘rsatgani haqida hikoya qilishga chaqiradi.
Agar siz rahbariyatingiz, hamkasblaringiz, boshqa tanishlaringiz yoki umuman notanish odamlarning shilqimligi va jinsiy zo‘ravonligiga duch kelgan bo‘lsangiz va bu haqda haqiqiy ismingizni yashirmay hikoya qilishga tayyor bo‘lsangiz — bizga yozing. Agar siz o‘zingiz kimgadir shilqimlik yoki tegajoqlik qilganingizni tushunib yetgan bo‘lsangiz va bu haqda haqiqiy ismingizni yashirmay hikoya qilishga tayyor bo‘lsangiz — bizga yozing. Biz barcha hikoyalarni o‘qib chiqamiz, rozilik bildirsangiz, hikoyangizni “Daryo”da chop etamiz.
Savolnomaning yuklanishi biroz vaqt olishi mumkin. Savolnoma yuklanmasa, hikoyani ushbu sahifaga o‘tib, yuborish mumkin.
Izoh (0)