Toshkentda 63 yoshli ayol nevarasi tengi yigit tomonidan zo‘ravonlikka uchragani haqida xabar berilgan edi. Poytaxt IIBB matbuot xizmati holat yuzasidan jinoyat ishi qo‘zg‘atilganini ma’lum qildi.
Xabarga ko‘ra, gumonlanuvchi 20 yoshli A.Z.ga nisbatan Chilonzor tumani IIO FMB Tergov bo‘limi tomonidan Jinoyat kodeksining 277-moddasi (bezorilik) alomatlari bilan jinoyat ishi qo‘zg‘atilib, tergov harakatlari olib borilmoqda. Tergov yakuni bo‘yicha qonuniy qaror qabul qilinadi.
Eslatib o‘tamiz, voqea haqida O‘zbekistonda zo‘ravonlikka qarshi “Nemolchi.uz” loyihasida e’lon qilingandi. Unda ertalab sayrga chiqqan 63 yoshli ayol mast holdagi yigit tomonidan zo‘ravonlikka uchraganini ma’lum qilingan. Yigit tegajog‘lik qilgani uchun qarshilik ko‘rsatgan ayolga o‘ldirish bilan tahdid qilib, kiyimlarini yirtib, kaltaklay ketgan. Hujumdan so‘ng ayolning sog‘lig‘iga jiddiy zarar yetgan: chap ko‘zning kontuziyasi, neyropatiya, chap ko‘z arterial gipertenziyasi.
Yigit va uning advokati esa voqeada ayolning o‘zini ayblamoqda. Ularning so‘zlariga ko‘ra, ayol yigitni haqorat qilib, keyin sababsiz urgan. Yigit mast bo‘lgani uchun hech narsani eslay olmaydi, biroq dastlab jabrlanuvchini sevgan qizi bilan adashtirib yuborgani esida. Advokat 63 yoshli ayol o‘ziga o‘zi zarar yetkazgan bo‘lishi mumkin deb ham hisoblamoqda. U, shuningdek, ayolni voqea joyida guvohlarni kutmaganlikda, 102 yoki 103 ga qo‘ng‘iroq qilmaganlikda ayblagan.
Izoh (0)