Farg‘ona shahrida 168 o‘rinli Prezident maktabi foydalanishga topshirildi. Bu haqda “Daryo” muxbiri Azizjon Ermatov xabar berdi.
Prezident maktabining tantanali ochilish marosimida viloyat hokimi Xayrullo Bozorov, Prezident ta’lim muassasalari agentligi direktori Hilola Umarova ishtirok etdi.
Qayd etilishicha, 168 o‘rinli o‘quv binosi va shuncha o‘ringa mo‘ljallangan yotoqxona, sport zali, basseyn, oshxona, sport maydonlari, 15 o‘rinli o‘qituvchilar mehmonxonasi Prezident maktablari standarti asosida qurilgan. Fan xonalari, laboratoriyalar, sport zallarida eng zamonaviy sharoitlar yaratilgan.
Maktab sinfxonalari jahon andozalariga mos holda har bir fan uchun maxsus jihozlangan. Xonalarga kirishda o‘rnatilgan elektron doskalarda dars jadvali, tanaffus vaqti, o‘qituvchi haqida qisqacha ma’lumot berib boriladi.
O‘quv jarayoni Kembrij universiteti bilan hamkorlikda ishlab chiqilgan o‘quv reja va dasturlar asosida ingliz tilida amalga oshiriladi.
Buning uchun AQSh, Buyuk Britaniya, Yangi Zelandiya, Filippin va Janubiy Afrika kabi davlatlardan 10 nafar chet ellik yuqori malakali mutaxassis tanlab olinib, dars mashg‘ulotlariga jalb qilingan. Shuningdek, 20 nafar tajribali mahalliy o‘qituvchi ham o‘quvchilarga saboq beradi.
Maktabda STEAM fanlari (Science — tabiiy fanlar, Technology – texnologiya, Engineering – texnik ijodkorlik, Art – san’at, Mathematics – matematika) chuqurlashtirib o‘rgatiladi.
2021-yilda maktabning 5–10-sinflari uchun hujjat topshirgan 10 mingga yaqin o‘quvchidan 144 nafari o‘qishga qabul qilingan. Har bir sinfda 12 nafardan o‘quvchi ta’lim oladi.
Bundan avval Andijonda 168 o‘rinli Prezident maktabi foydalanishga topshirilgani, Shavkat Mirziyoyev Qorako‘ldagi Xalqaro matematika maktabini borib ko‘rgani hamda Qarshidagi Prezident maktabiga tashrif buyurib, o‘quvchilar bilan suhbatlashgani haqida xabar berilgandi.
Izoh (0)