“Uch yilda tuproq yo‘llar, to‘rt yilda ta’mirtalab yo‘llar qolmaydi” – Avtomobil yo‘llari qo‘mitasi raisi

Avtomobil yo‘llari qo‘mitasi raisi Abdurahmon Abduvaliyev Senatda yaqin 3 yil ichida O‘zbekistondagi barcha tuproq yo‘llar asfaltlanishi, 4 yildan so‘ng esa ta’mirtalab yo‘llar qolmasligini ma’lum qildi.

“Prezident topshirig‘i bo‘yicha katta loyiha ishlab chiqilgan. Bunda 121 ming kilometr yo‘l 2016-yil 1-yanvar holatiga ko‘ra yomon ahvolda edi. Lekin ajratilgan mablag‘lar hisobidan 56 700 kilometr yo‘l 5 yil davomida ta’mirlandi. Hozirda 64 mingdan ortiqroq yo‘l ta’mirtalab ahvolda, shundan umumiy foydalanishdagi yo‘llar 5 100 kilometr, qolgani ishchi xo‘jalik yo‘llari.

2021-yil 1-yanvar holatiga ko‘ra, 31 400 kilometr tuproq yo‘l bor edi. Ajratilgan mablag‘lar hisobidan 11 400 kilometr yo‘l shag‘al qilindi, 5 ming kilometrdan ortqi ichki xo‘jalik yo‘llari asfaltlandi.

Prezident topshirig‘i asosida ishlab chiqilgan loyihaga ko‘ra, ushbu (tuproq — tahr.) yo‘llar yo‘q qilinadi. 3 yil davomida, Xudo xohlasa, tuproq yo‘llar O‘zbekistonda bo‘lmaydi. Qolgan yo‘llarning barchasini 4 yil davomida to‘liq ta’mirlanadi. Shundan so‘ng grafikka tushib olib, shu grafik bo‘yicha ishlarni amalga oshiramiz.

Shuningdek, 5 yil davomida 1 500 tada oshiq ko‘prik ta’mirlangan bo‘lsa, 2021-yilning o‘zida 300 tadan ortiq ko‘prik ta’mirlanadi. Bugungi kunda 229 ta ko‘prik ta’mirlanmoqda”, – deydi Abdurahmon Abduvaliyev.