“Tolibon” Afg‘onistonda to‘ylarda jonli musiqani taqiqladi
Afg‘onistonda hokimiyatni egallab olgan “Tolibon” harakati mamlakatda to‘ylarni o‘tkazish bo‘yicha qoidalarni joriy qildi, ulardan biri tantanalar chog‘ida jonli musiqa bo‘lishini taqiqlaydi.Mahalliy telekanallardan biri ma’lum qilishicha, tegishli qaror yaqinda Ayollar masalalari bo‘yicha vazirlik o‘rnida tashkil qilingan Ezgulikni targ‘ib qilish va illatlarni yo‘qotish vazirligining maxsus majlisida qabul qilingan.
Shuningdek, bayram ziyofati oldidan nikoh marosimini o‘tkazish taqiqlandi. Bundan tashqari, tadbirlar chog‘ida ayollar va erkaklar boshqa-boshqa xonalarda bo‘lishi haqida buyruq berildi.
To‘y ko‘pchilik afg‘onlar uchun hayotdagi eng asosiy voqea hisoblanib, odatda uch kun davom etadi. Ziyofatga bir necha yuzlab mehmonlar chaqirilib, noz-ne’matga boy dasturxon yoziladi va qimmatbaho sovg‘alar beriladi: badavlat oilalar yer-mulk, mashina va hatto uy sovg‘a qilishi ham mumkin.
“Tolibon” Afg‘onistonda qayta hokimiyatga kelganidan so‘ng musiqani taqiqlagan edi. AP’ning ta’kidlashicha, hozircha ular to‘g‘ridan to‘g‘ri taqiq qo‘ymagan, lekin joylarda harakat vakillari o‘z qoidalarini joriy qilib, konsert o‘tkaziladigan joylar va yakka musiqachilarni ta’qib qilishni boshlagan.
Afg‘onistondagi diniy maktabda portlash yuz berdi
Afg‘onistonning Xost viloyatidagi Mazhar al-Ulum madrasasida portlash sodir bo‘lib, yetti kishi halok bo‘ldi.IIV ma’lumotlariga ko‘ra, diniy maktabda talabalar yig‘ilishi chog‘ida qo‘l granatasi portlab ketgan. 15 dan ortiq odam jabrlandi.
4-oktabr kuni Afg‘onistonda jurnalist va yozuvchi Said Ma’ruf Saodatning avtomobili o‘qqa tutilgan, oqibatda uch kishi, shu jumladan, jurnalistning o‘zi ham halok bo‘lib, yana ikki kishi yaralangan edi.
3-oktabr kuni esa Kobuldagi masjid oldida yuz bergan portlashda 12 kishi halok bo‘lib, 32 kishi jarohatlandi.
Otishma va portlash uchun hech qaysi tashkilot mas’uliyatni o‘z zimmasiga olganicha yo‘q.
AQSh Ashraf Ga‘ni Afg‘onistondan qochishda millionlab dollar pulni olib ketgan-ketmaganini tekshiradi
AQSh hukumatining Afg‘onistonni qayta tiklash masalalari bo‘yicha bosh inspektori Jon Sopko ma’lum qilishicha, u Afg‘oniston prezidenti vakolatlarini topshirgan Ashraf G‘ani mamlakatdan qochish chog‘ida millionlab dollar pullarni olib ketgani haqidagi ma’lumotlarni o‘rganmoqda.Tegishli savol unga 6-oktabr kuni AQSh Kongressining Vakillar palatasi Tashqi ishlar qo‘mitasi eshituvlarida berildi. “Hozircha buni isbotlaganimiz yo‘q. Buni o‘rganyapmiz”, — dedi Sopko.
15-avgust kuni “Tolibon” Kobulga kirib, prezident saroyini egallab oldi va mamlakatdagi hokimiyatni o‘z qo‘liga olganini e’lon qildi. Shu kuniyoq Afg‘oniston prezidenti Ashraf G’ani mamlakatdan qochib ketdi. Bir necha kundan keyin u oilasi bilan Birlashgan Arab Amirliklarida ekani ma’lum bo‘ldi. 18-avgust kuni G‘ani Afg‘oniston xalqiga murojaat yo‘llab, mamlakatga qaytishga va’da berdi. G‘ani buning uchun maslahatlashuvlar olib borayotganini aytdi, ammo aynan kim bilan ekanini ochiqlamadi.
Prezident qochib ketganidan keyin u o‘zi bilan moddiy boyliklar, shu jumladan, juda katta qiymatda naqd pul olib ketgani haqida ma’lumot paydo bo‘ldi. G‘anining o‘zi bu ayblovlarni yolg‘on va “mutlaqo asossiz” deb atadi.
Keyinroq “Tolibon” Ashraf G‘ani Afg‘onistondan o‘g‘irlab ketgan pullar qaytarilishini talab qildi. “Ashraf G‘ani davlat mablag‘larini o‘g‘irlab ketdi, biz esa ularni qaytarishni talab qilamiz. Ular xalqqa va bizning banklarimizga tegishli”, — dedi Afg‘onistondagi muvaqqat hukumat madaniyat va axborot vaziri o‘rinbosari Zabihulla Mujohid.
Izoh (0)