«Толибон» Афғонистонда тўйларда жонли мусиқани тақиқлади
Афғонистонда ҳокимиятни эгаллаб олган «Толибон» ҳаракати мамлакатда тўйларни ўтказиш бўйича қоидаларни жорий қилди, улардан бири тантаналар чоғида жонли мусиқа бўлишини тақиқлайди.Маҳаллий телеканаллардан бири маълум қилишича, тегишли қарор яқинда Аёллар масалалари бўйича вазирлик ўрнида ташкил қилинган Эзгуликни тарғиб қилиш ва иллатларни йўқотиш вазирлигининг махсус мажлисида қабул қилинган.
Шунингдек, байрам зиёфати олдидан никоҳ маросимини ўтказиш тақиқланди. Бундан ташқари, тадбирлар чоғида аёллар ва эркаклар бошқа-бошқа хоналарда бўлиши ҳақида буйруқ берилди.
Тўй кўпчилик афғонлар учун ҳаётдаги энг асосий воқеа ҳисобланиб, одатда уч кун давом этади. Зиёфатга бир неча юзлаб меҳмонлар чақирилиб, ноз-неъматга бой дастурхон ёзилади ва қимматбаҳо совғалар берилади: бадавлат оилалар ер-мулк, машина ва ҳатто уй совға қилиши ҳам мумкин.
«Толибон» Афғонистонда қайта ҳокимиятга келганидан сўнг мусиқани тақиқлаган эди. АПънинг таъкидлашича, ҳозирча улар тўғридан-тўғри тақиқ қўймаган, лекин жойларда ҳаракат вакиллари ўз қоидаларини жорий қилиб, концерт ўтказиладиган жойлар ва якка мусиқачиларни таъқиб қилишни бошлаган.
Мавзуга доир: Афғонистонда 100 дан ортиқ мусиқачи мамлакатни тарк этди
Афғонистондаги диний мактабда портлаш юз берди
Афғонистоннинг Хост вилоятидаги Мазҳар ал-Улум мадрасасида портлаш содир бўлиб, етти киши ҳалок бўлди.ИИВ маълумотларига кўра, диний мактабда талабалар йиғилиши чоғида қўл гранатаси портлаб кетган. 15 дан ортиқ одам жабрланди.
4 октябрь куни Афғонистонда журналист ва ёзувчи Саид Маъруф Саодатнинг автомобили ўққа тутилган, оқибатда уч киши, шу жумладан, журналистнинг ўзи ҳам ҳалок бўлиб, яна икки киши яраланган эди.
3 октябрь куни эса Кобулдаги масжид олдида юз берган портлашда 12 киши ҳалок бўлиб, 32 киши жароҳатланди.
Отишма ва портлаш учун ҳеч қайси ташкилот масъулиятни ўз зиммасига олганича йўқ.
АҚШ Ашраф Гаъни Афғонистондан қочишда миллионлаб доллар пулни олиб кетган-кетмаганини текширади
АҚШ ҳукуматининг Афғонистонни қайта тиклаш масалалари бўйича бош инспектори Жон Сопко маълум қилишича, у Афғонистон президенти ваколатларини топширган Ашраф Ғани мамлакатдан қочиш чоғида миллионлаб доллар пулларни олиб кетгани ҳақидаги маълумотларни ўрганмоқда.Тегишли савол унга 6 октябрь куни АҚШ Конгрессининг Вакиллар палатаси Ташқи ишлар қўмитаси эшитувларида берилди. «Ҳозирча буни исботлаганимиз йўқ. Буни ўрганяпмиз», — деди Сопко.
15 август куни «Толибон» Кобулга кириб, президент саройини эгаллаб олди ва мамлакатдаги ҳокимиятни ўз қўлига олганини эълон қилди. Шу куниёқ Афғонистон президенти Ашраф Ғани мамлакатдан қочиб кетди. Бир неча кундан кейин у оиласи билан Бирлашган Араб Амирликларида экани маълум бўлди. 18 август куни Ғани Афғонистон халқига мурожаат йўллаб, мамлакатга қайтишга ваъда берди. Ғани бунинг учун маслаҳатлашувлар олиб бораётганини айтди, аммо айнан ким билан эканини очиқламади.
Президент қочиб кетганидан кейин у ўзи билан моддий бойликлар, шу жумладан, жуда катта қийматда нақд пул олиб кетгани ҳақида маълумот пайдо бўлди. Ғанининг ўзи бу айбловларни ёлғон ва «мутлақо асоссиз» деб атади.
Кейинроқ «Толибон» Ашраф Ғани Афғонистондан ўғирлаб кетган пуллар қайтарилишини талаб қилди. «Ашраф Ғани давлат маблағларини ўғирлаб кетди, биз эса уларни қайтаришни талаб қиламиз. Улар халққа ва бизнинг банкларимизга тегишли», — деди Афғонистондаги муваққат ҳукумат маданият ва ахборот вазири ўринбосари Забиҳулла Мужоҳид.
Изоҳ (0)