Turkiya parlamenti iqlim bo‘yicha Parij bitimini ratifikatsiya qilish haqidagi qonun loyihasini qabul qildi. Bu haqda Anadolu agentligiga tayanib “RBK” xabar berdi.
“Turkiya Buyuk milliy majlisi (parlamenti) Bosh assambleyasi iqlim bo‘yicha Parij bitimini ratifikatsiya qilish to‘g‘risidagi qonun loyihasini qabul qildi”, — deyiladi xabarda.
Ta’kidlanishicha, qonun loyihasi parlamentdagi barcha siyosiy partiyalar tomonidan bir ovozdan qo‘llab-quvvatlangan.
Parij bitimi 2015-yilgi iqlim konferensiyasida 196 mamlakat vakillari tomonidan imzolangan edi. Hujjat 2020-yilda rasman kuchga kirdi. U 1997-yilda qabul qilingan Kioto protokoli o‘rnini egalladi (issiqxona gazlari ajralib chiqishi bo‘yicha kvotalarni ko‘zda tutadi).
Parij kelishuvining maqsadlaridan biri — Birlashgan Millatlar Tashkilotining Iqlim o‘zgarishi to‘g‘risidagi konvensiyasini “amalga oshirishni kuchaytirish”, xususan, global o‘rtacha harorat ko‘tarilishini Selsiy bo‘yicha ikki darajadan “pastda” ushlab turish va haroratning ko‘tarilishini 1,5 darajagacha cheklashga harakat qilish. Boshqa masalalar qatorida, hujjat issiqxona gazlari ajralib chiqishini kamaytirishni, shuningdek, ekologik muammolarni hal qilish uchun kambag‘al mamlakatlarga yiliga qariyb 100 milliard dollar ajratishni nazarda tutadi. Bu miqdorni 2025-yildan keyin oshirish rejalashtirilgan.
O‘zbekiston iqlim o‘zgarishi bo‘yicha Parij bitimini 2017-yil, 19-aprel kuni imzolagan. Jahon AA xabariga ko‘ra, shu kunning o‘zida O‘zbekiston Parij bitimini imzolagan mamlakatlar ro‘yxatiga kiritilgani haqida axborot materiali tayyorlanib, BMT Kotibiyati tomonidan tashkilotga a’zo davlatlar o‘rtasida tarqatilgan.
Izoh (0)