Afg‘oniston milliy musiqa institutiga aloqador yuzlab afg‘onlar Kobulni tark etdi. Institut direktori Ahmad Sarmastning ma’lum qilishicha, Portugaliya hukumati ularga boshpana berishga rozi bo‘lgan.
Foto: AP Photo
Mamlakatni tark etgan 101 kishidan iborat guruhning yarmini talabalar, asosan, Zohra ayollar orkestrining a’zolari tashkil qilgan, shuningdek, bitiruvchilar, o‘qituvchilar va ba’zi musiqachilarning qarindoshlari ham jo‘nab ketgan. Bu butun institut jamoasining uchdan bir qismiga teng. Ular 3-oktabr kuni Qatarga uchib ketgan. Samolyot bortida yana 134 nafar afg‘onistonlik bo‘lgan. Associated Press ushbu reysni avgust oyidagi asosiy evakuatsiya bosqichi tugaganidan buyon Kobuldan amalga oshirilgan eng yirik parvoz deb atadi.
Musiqa institutining asoschisi va rahbari Ahmad Sarmast hozircha Avstraliyaning Melburn shahrida, lekin u Portugaliyada o‘z talabalari uchun o‘qishni qayta tiklashni rejalashtirmoqda. AP’ning ta’kidlashicha, Afg‘onistonni o‘n minglab fuqarolar, jumladan, sportchilar va san’atkorlar tark etgan. Yaqinda Afghan Dreamers’ning bir guruh ayol robototexniklari Meksikaga, afg‘onistonlik ayollar futbol jamoasi esa Portugaliyaga ko‘chib ketdi.
“Tolibon” Afg‘onistonda qayta hokimiyatga kelganidan so‘ng musiqani taqiqlagan edi. AP’ning ta’kidlashicha, hozircha ular to‘g‘ridan to‘g‘ri taqiq qo‘ymagan, lekin joylarda harakat vakillari o‘z qoidalarini joriy qilib, konsert o‘tkaziladigan joylar va yakka musiqachilarni ta’qib qilishni boshlagan.
Afg‘oniston milliy musiqa instituti 2010-yilda tashkil etilgan. Uning talabalari AQSh va Yevropada konsert bergan, deb eslatadi AP. Hozir institut binosi bo‘m-bo‘sh, uni “Haqqoniy tarmog‘i” (toliblarning ittifoqchisi) jangarilari qo‘riqlamoqda. Mamlakatda hukumat almashgan paytda institutda 350 talaba tahsil olayotgan edi.
Avvalroq “Tolibon” jangarilari qo‘shiqchi va xalq kuylari ijrochisi Favad Andarabiyni qatl etgani haqida xabar berilgandi.
