Afg‘onistondan qochib ketgan prezident Ashraf G‘ani davlat g‘aznasidan 169 million dollar o‘g‘irlagan. Bu haqda Afg‘onistonning Tojikistondagi elchisi Muhammad Zohir Agbar Dushanbeda o‘tkazilgan matbuot anjumanida ma’lum qildi.

Foto: EPA

Elchi prezident G‘anining qochishini “davlat va millatga xiyonat” deb atadi hamda uning “davlat g‘aznasidan 169 million dollar o‘g‘irlaganini” ma’lum qildi.

Shu bilan birga, elchi Afg‘oniston bosh vaziri o‘rinbosari Amrulla Solihni davlat rahbari sifatida tan olishini aytdi.

“Mamlakat konstitutsiyasiga muvofiq, prezident iste’foga chiqsa, qochib ketsa yoki vafot etsa birinchi o‘rinbosar prezidentning vazifalarini bajaradi, shuning uchun Amrulla Solih hozir davlat rahbaridir”, — dedi elchi.

Agbar, shuningdek, Ashraf G‘anini xalqaro sudga olib borishlari uchun uni hibsga olish haqidagi so‘rov bilan Interpolga murojaat qilishini aytdi

“RIA Novosti” xabariga ko‘ra, Interpolning Tojikistondagi Milliy markaziy byurosi direktori Shahriyor Nazriyevga G‘anini hibsga olish haqida bunday murojaat kelib tushmagan. “Avvalo ular (Afg‘oniston) Interpol bosh kotibiga qidiruv haqida ariza bilan murojaat qilishi kerak, shundan so‘ng biz buni ko‘rib chiqamiz”, — dedi u.

15-avgust kuni “Tolibon” butun Afg‘oniston uning nazorati ostiga o‘tganini ma’lum qilgach, mamlakat prezidenti Ashraf G‘ani mamlakatdan uchib ketgani xabar berildi. Ashraf G‘ani bilan birga Kobuldan rafiqasi Rula G‘ani, yana ikki kishi, jumladan, maslahatchisi bilan birga chiqib ketgan. Bir necha kundan beri G‘anining qayerda ekanligi haqida rasmiy ma’lumot berilmayotgan edi.

G‘anining o‘zi Facebook’dagi sahifasida davlat rahbarligidan mamlakatdagi qonli to‘qnashuvlarning oldini olish maqsadida iste’foga chiqqani haqida yozgan. Keyinchalik Ashraf G‘anining Kobuldan qochayotgan vaqtida vertolyotga sig‘maydigan darajada ko‘p pullarni olib chiqib ketishga uringani to‘g‘risida ma’lumotlar tarqalgan.

Afg‘oniston prezidenti Ashraf G‘ani o‘zining Facebook orqali yo‘llagan videomurojaatida aytishicha, u xavfsizlik xizmati tomonidan mamlakatni tark etishga majbur qilingan. G‘ani katta miqdordagi pulni olib chiqib ketganini rad etdi.

“Meni o‘zim bilan pul olib ketganlikda ayblashmoqda. Lekin bu hammasi yolg‘on, men ustimdagi ko‘ylak, salla va poyabzal bilan mamlakatni tark etdim, bitta sumkada bir nechta kitob olib ketoldim, xolos”, — deydi G‘ani.

Prezident Birlashgan Arab Amirliklarida ekanini tasdiqladi. U Afg‘onistonga qaytish bo‘yicha maslahatlashuv o‘tkazmoqda.

“Mamlakatni tark etishdan oldin, hokimiyatni tinch yo‘l bilan topshirish uchun shart-sharoit yaratish va Kobul xavfsizligini ta’minlash bo‘yicha muzokaralar olib boradigan delegatsiya topish maqsadida “Tolibon” bilan ish olib bordim”, — dedi G‘ani.

U shuningdek, Afg‘onistonda tez orada tinchlik va barqarorlik hukm surishiga umid qilayotganini ta’kidlab o‘tdi.