Afg‘oniston prezidenti Ashraf G‘ani iste’fo berishga rozi bo‘ldi va mamlakatni tark etdi. Bu haqda Tojikistonning Asia-Plus agentligi G‘ani ma’muriyati amaldorlaridan biri Sajad Nuristoniyga tayanib xabar bermoqda.
Uning so‘zlariga ko‘ra, Ashraf G‘aniga uning milliy xavfsizlik bo‘yicha maslahatchisi Hamdulla Muhib va ma’muriyat rahbari Fazl Mahmud Fazliy hamrohlik qilmoqda. Nuristoniy qayd etishicha, G‘ani dastlab Tojikistonga boradi, so‘ng uchinchi mamlakatga uchib ketishi kerak, ammo qaysi mamlakat ekani hozircha noma’lum.
Mamlakatda o‘tish davri hukumati rahbari majburiyatlarini Afg‘oniston sobiq ichki ishlar vaziri Ahmad Jaloliy o‘z zimmasiga oladi.
Avvalroq “Tolibon” iste’fo berishi kutilayotgan prezident Ashraf G‘anidan hokimiyatni qabul qilib olmasligini ma’lum qilgan edi.
Shuningdek, Rossiyaning Kobuldagi elchixonasi vakili Nikita Ishchenko Ashraf G‘ani prezident saroyidan qochib ketganini ma’lum qilgan.
Afg‘oniston hukumati hozircha prezidentning mamlakatni tark etgani haqidagi ma’lumotni izohlaganicha yo‘q.
Afg‘oniston sobiq prezidenti Hamid Karzay aholiga “Tolibon” harakati hujumlariga qaramasdan, mamlakat hududini tark etmaslikka va’da berdi. Bundan tashqari, u fuqarolarni uyda qolishga chaqirdi. Ayni paytda vaziyatni tinch yo‘l bilan hal qilishga harakat qilinmoqda, dedi u.
Afg‘oniston hukumati delegatsiyasi esa mamlakatning Milliy yarashuv bo‘yicha oliy kengashi rahbari Abdulla Abdulla bilan birgalikda “Tolibon” harakatining siyosiy idorasi bilan kelishuvga erishish uchun Qatarga jo‘nab ketadi.
Abdulla Abdulla “Tolibon” vakillari va Kobuldagi hukumat o‘rtasida vositachi bo‘lib qatnashadi.
Ali Ahmad Jaloliy kim?
U 80 yoshda, Kobulda tug‘ilgan. “Amerika ovozi” radiostansiyasi sobiq jurnalisti. 1982-yildan 2003-yilgacha Afg‘oniston, Eron va Markaziy Osiyodagi pushtu, dari va fors tillaridagi radioeshittirishlarga rahbarlik qilgan. Afg‘onistonning Germaniyadagi elchisi bo‘lib ishlagan. 2003-yildan 2005-yil sentabrgacha Afg‘oniston Ichki ishlar vazirligiga rahbarlik qilgan.
2005-yil oktabridan boshlab Vashington Milliy mudofaa instituti huzuridagi Yaqin Sharq va Janubiy Osiyo strategik tadqiqotlar markazining xizmat ko‘rsatgan professori hisoblanadi. Bir nechta kitoblar, shu jumladan, uch jildli Afg‘oniston harbiy tarixi muallifi. 1987-yilda AQSh fuqaroligini olgan.
Avvalroq “Tolibon” harakati Afg‘oniston hududini to‘liq o‘z nazorati ostiga olganini e’lon qildi. Harakat Afg‘onistonni tark etmoqchi bo‘lgan barcha chet elliklar Kobul aeroporti orqali mamlakatdan to‘siqsiz chiqib ketishiga va’da bermoqda. Qolish istagida bo‘lganlar esa harakat vakillariga uchrashib, ro‘yxatdan o‘tishi kerak.
Shuningdek, “Tolibon” Afg‘onistonni egallab olgach, matbuot va ayollar uchun o‘z shartlarini e’lon qildi. Afg‘onistonda “Tolibon” harakati hukmronligi ostida ayollar ta’lim olishi va ishlashi, jurnalistlar esa hodisalarni tanqid qilishi mumkin bo‘ladi.
