Jons Hopkins universiteti ma’lumotlariga ko‘ra, dunyoda koronavirusga chalinganlar soni 236 537 162 kishini tashkil qilmoqda. Shularning 4 828 794 nafari vafot etgan. Shuningdek, jahon bo‘yicha qo‘llanilgan vaksina 6,370 milliard dozadan oshdi.
Kasallanish holatlarining ko‘pligi bo‘yicha AQSh (44 million), Hindiston (33,8 million), Braziliya (21,5 million), Rossiya (7,5 million) va Turkiya (7,3 million) eng oldinda bormoqda.
Rossiyada gripp va koronavirusga qarshi yagona vaksina yaratiladi
Rossiyada Gamaleya nomidagi markaz (“Sputnik V” vaksinasini ishlab chiqqan) 2022-yil oxirida gripp va koronavirusga qarshi yagona vaksinaning klinik sinovlarini boshlaydi.Markaz direktori Aleksandr Ginsburgning so‘zlariga ko‘ra, yangi preparatga rotaviruslarga qarshi gibrid vaksina asos qilib olingan, u bilan birgalikda koronavirusning turli variantlariga qarshi preparat ustida ham ish olib borilmoqda.
“Buning uchun texnologik platforma yaratib bo‘lingan, ammo klinik sinovlar hali boshlangani yo‘q. Agar bu platforma bilan hammasi yaxshi bo‘lsa, aynan shu texnologiya ish bersa, unda yanada murakkabroq variantga o‘tamiz, bu — bitta vaksinada bir vaqtning o‘zida gripp gemagglyutinini antigenlarini hamda koronavirusning S-oqsillarini jamlash. Yangi preparatning klinik sinovlari kelasi yil oxirida boshlanadi”, — dedi Ginsburg.
JSST KXDRga koronavirusga qarshi dori-darmonlarni yetkazishni boshladi
Jahon sog‘liqni saqlash tashkiloti (JSST) COVID-19 ga qarshi tibbiyot vositalarini Shimoliy Koreyaga Xitoyning Dalyan porti orqali yetkazib berishni boshladi.Tibbiy yordam aynan nimalardan iborat ekanligi va uni yuborish qachon boshlangani noma’lum, ammo Yonhap agentligi taxmin qilishicha, yuklarni yuborish o‘tgan oy oxirida boshlangan bo‘lishi mumkin.
Endi Shimoliy Koreya pandemiya tufayli kiritilgan qat’iy chegara nazoratini yumshatishi mumkinligi ham taxmin qilinmoqda. Aniqlik kiritilishicha, 2020-yil yanvaridan buyon KXDR chegaralari chet elliklar va mahalliy fuqarolar uchun butunlay yopilgan.
AQShda COVID-19 ga qarshi emlanmaganlarga organlarni ko‘chirib o‘tkazishni rad etish boshlandi
Kolorado shtati tibbiyot muassasalari notijorat uyushmasi UCHealth “deyarli har qanday vaziyatda” COVID-19 ga qarshi vaksinatsiyadan o‘tmagan bemorlarga organlar transplantatsiyasini rad etishni boshladi.UCHealth ma’lum qilishicha, u organlar retsipiyentlarining barchasiga boshqa tibbiy talablarga qo‘shimcha ravishda, koronavirusga qarshi emlanish majburiyatini yuklaydi. Tashkilot vakili Den Uiverning so‘zlariga ko‘ra, mamlakatdagi boshqa organlar transplantatsiyasi markazlari ham shunday amaliyotga rioya qilmoqda yoki shunga o‘tmoqda.
UCHealth koronavirus o‘pka ko‘chirib o‘tkazilgan odamlarning o‘limiga olib kelishi haqidagi tadqiqotga asoslangan. Uiverning aytishicha, bunday hollarda o‘lim ehtimoli 20—30 foizga teng bo‘ladi, taqqoslash uchun, mamlakatda odatiy daraja 1,6 foizni tashkil etadi.
Shvetsiya va Daniya yoshlarni Moderna vaksinasi bilan emlashni to‘xtatdi
Shvetsiya va Daniya hukumatlari 1991-yildan keyin tug‘ilgan odamlarni Moderna kompaniyasining koronavirusga qarshi vaksinasi bilan emlashni to‘xtatdi. Bu miokardit kabi noyob nojo‘ya ta’sirlar yuzaga kelishi bilan bog‘liq.Shvetsiyaning Sog‘liqni saqlash masalalari bo‘yicha agentligi ma’lumotlari vaksina olgan yoshlar orasida miokardit va perikardit holatlari tarqalganini ko‘rsatmoqda.
“Moderna kompaniyasining Spikevax vaksinasiga kelganda bog‘liqlik yanada oydinlashmoqda, ayniqsa, ikkinchi dozadan keyin”, — deyiladi agentlik bayonotida.
Ayni vaqtda, ta’kidlanishicha, ushbu nojo‘ya ta’sirlar yuzaga kelishi ehtimoli juda past. Shunga qaramay, endi agentlik yoshlarga Pfizer/BioNTech’ning Comirnaty vaksinasini olishni tavsiya qilmoqda.
Izoh (0)